10/10/2018

Caroli Caputii archiepiscopi de sexualitate sententiae


ut hic refertur, Carolus Caputius archiepiscopus Philadelphiensis in synodo dixit, "ea quae de sexualitate humana uera esse ecclesia affirmat non scandalum sed sola ad gaudium et integritatem uia uera sunt. non est 'Catholicus LGBTQ' uel 'Catholicus transsexualis' uel 'Catholicus heterosexualis', quasi appetitus sexuales nostri definiant qui simus, quasi haec uocabula intra consortium ecclesiasticum uerum Iesu Christi corpus consortia discreta uariae sed aequalis ualiditatis describant. quod in ecclesiae uita numquam uerum erat nec nunc uerum est. sequitur quod 'LGBTQ' uocabulum et similia in litteris ecclesiasticis non adhiberi oportet. nam eorum uocabulorum usus importat illos consortia uera et autonoma esse, sed ecclesia, ne plura dicam, homines non in tales categorias discribit."

nam, ut Carolus Caputius se intellegere ostendit, si recte cogitare uolumus necesse est uocabula non idonea abiicere.

10/06/2018

Taciti de urbe sententia


"urbem...quo cuncta undique atrocia aut pudenda confluunt celebranturque" (Annales 15.44)

uniuersitates scholarium


ut hic dicitur, "nonnulli imperatores scholastici...nullas uestes gerunt."

9/22/2018

ecclesiae problemata et scholarum publicarum pericula


hic apud Relationem Mundanam Catholicam Petrus Strauinius sacerdos disserit quae problemata ecclesiae insint et quomodo solui possint. 

praesertim noto ea quae ille de scholis dicit, qualia pericula scholis publicis insint, et quod de ea re sacerdotes loqui nolunt, praesertim hoc "quando nouissime audiuisti sacerdotem uel episcopum publice dicentem quod scholae politicae paruulorum animas cotidie in periculo ponunt?" quod scilicet numquam auditur, ut ille dicit, primum quia sacerdotes et episcopi timent ne tali sententia audita qui parentes scholis publicis utuntur et qui praeceptores in iis operantur ii ita afficiantur ut se ingratos esse sentiant et secundum quia institutionis religionalis rectores timent. et ille dicit quod curandarum scholarum Catholicarum officium nec parentium nec paroeciarum est sed totius dioecesis omniumque eius membrorum. et hoc "quomodo fit ut eorum quae Catholica nostra constituta sunt maior pars ab aduenis inopibus aedificata sit sed qui populus Catholicus maximas opes in omni ecclesiae aetate habet ab eo populo ali non possit? problema nostrum pecuniarium non est sed fides, uel, ut uerius dicam, eius absentia. quamquam res pecuniaria aliquibus parentibus obstare potest tamen hoc notandum est quod nimio familiarum numero inest rerum aestimatio praepostera. itaque iterum ubi est episcopus uel sacerdos qui parentes interroget rectene aestiment? silentium ipsum clamat."

etiam Augustinus Rusus et Catharina de scholarum publicarum periculis hic disserunt.

et hoc.

8/22/2018

loca ubi nec calor nec frigus nimis magnum est


hic Nolanus Graius dicit esse inter calorem et frigus mediocritatem per totum annum in his locis:

1. Antananariuus in Madagascaria
2. Bogota in Columbia
3. Iacobopolis in Venetiola
4. Durbanum in Africa Australi
5. Vrbs Guatimaliensis in Guatimalia
6. Lima in Peruuia
7. Mexicopolis in Mexico
8. Nairobia in Cenia
9. Portus Elisabethanus in Africa Australi
10. Quitum in Aequatoria
11. Didacopolis in California
12. Paulopolis in Brasilia
13. Sydneium in Australia

8/15/2018

epistola ad cardinales


huic faueo, quod Latine reddidi:

Eminentiis Reuerendissimis Sanctae Romanae Ecclesiae Cardinalibus.
 
propterea quod hoc uerum Dei uerbo inest et Ecclesiae Catholicae magisterio ordinario uniuersalique docetur, quod homines crimine damnati potestate saeculari interfici iure possunt quando id ad ordinem iustum in conuersatione ciuili seruandum necessarium est, et propterea quod hic pontifex Romanus iam plus quam semel se eam doctrinam docere abnuentem palam manifestauit ac potius magnam confusionem Ecclesiae intulit quippe qui ei contraria dicere uidetur et Ecclesiae Catholicae Catechismo inseuit paragraphema quod efficiet et iam efficit ut multi et fideles et infideles putent Ecclesiam contra Dei uerbum existimare poenam capitalem intrinsece malam esse, Eminentias Vestras prouocamus ut Eius Sanctitatem moneatis eius officium esse huic scandalo finem imponere et illud paragraphema ex Catechismo demere et Dei uerbum purum docere; et profitemur hoc nobis persuasum esse quod hoc officium uos coram Deo et coram Ecclesia grauiter alligat.

8/14/2018

is qui se Franciscum papam appellat


Thomas Rosica sacerdos hic dicit "Franciscus papa traditiones Catholicas quandocumque uult frangit quia 'ab affectibus inordinatis liber' est. ecclesia nostra quidem modo nouo se habere coepit: nam huius papae Iesuitae primi aduentu palam ab homine particulari potius quam scripturae solius auctoritate uel etiam iis quae a traditione dictata habet simulque scriptura regitur."

ego autem scriptura traditioneque regar.

8/13/2018

libertas religionalis et seruitus et usura


hic Gulielmus Neutonus doctor argumentatur ecclesiae Catholicae de libertate religionali et seruitute et usura doctrinas non mutatas esse. eius argumentationes mihi dubiae sunt, sed de illis rebus indagationis principio sunt, et est fontium index quoque.

8/08/2018

cur scientia mathematica discatur


hic Abigaila Herbst sic disserit cur scientia mathematica discatur: "scientiam mathematicam discere...mentes nostras format. ea nos instituit ad considerandas res quas uidere non possumus sed quae semper actu sunt nec mutantur....ut breuiter dicam, cum scientiam mathematicam discimus mente sola non sensibus utimur. eam Socrates dicit studium quod 'e natura ad intellegendum fert.' et, id quod maioris momenti est, scientia mathematica semper eadem est....cum scientiam mathematicam discimus mentibus utimur ad discendas res quae semper uerae sunt. ut Socrates dicit, scientia mathematica est 'causa sciendi eius quod semper est neque ullatenus eius quod quolibet tempore fit et perit.' in fine igitur hoc nos docet quod scientiam mathematicam discimus non solummodo quia ea utilis est uel ad rem pertinet sed scientiam mathematicam discimus quia ea nos modo qui ab iis quae sentimus totus abstractus est cogitare docet. scientiam mathematicam discimus quia ea una ex paucis iis quae numquam mutantur est....cum scientiam mathematicam discimus cogitare discimus--mundum mentibus neque sensibus solis uidere. nonne quidem haec est causa cur primum paruuli scholam frequentent?....si credimus inesse institutioni causas finales altiores, nos oportet eum animum quo ad 'inutilem' scientiam mathematicam sumus mutare. ea quae discipuli in schola discunt fortasse iis utilia non statim sunt, id quod interdum probum est."

7/19/2018

liber titulo 1984


partes memoria dignissimae

"semper intemperantissime Parti fauebant feminae ac praecipue eae quae pauciores annos habebant, sententias politicas ac breues deuorabant, nullius rei nisi studii gratia explorabant, et antiorthodoxiam odorabantur." (10)

"umbra solitaria erat, edens uerum quod nemo umquam audiret. sed dummodo id ederet aliquo modo obscuro continuatio non fracta est. hereditatem humanam producis non efficiendo ut audiaris sed retinenda mente sana." (27)

"tandem futurum erat ut Pars nuntiaret duo et duo quinque facere, et id credere cogereris." (80)

"[Brianides Guinstonio dicit] 'credis rem ueram aliquid obiectiuum esse externum per se actu essens. etiam credis rei uerae naturam per se notam esse. cum autem te ita seducis ut existimes te aliquid uidere, ponis omnes alios idem ac te uidere. sed tibi dico, Guinstoni, rem ueram externam non esse. res uera in mente humana est neque aliubi. non in mente indiuiduali quae errare potest et utcumque mox perit, in Partis mente sola quae uniuersalis et immortalis est. quicquid Pars uerum esse retur uerum est. res uera uideri non potest nisi per Partis oculos tuendo.'" (249)

"[Guinstonius Brianidae dicit] 'duo et duo quattuor sunt.' [Brianides respondet] 'interdum, Guinstoni. interdum quinque sunt. interdum tria sunt. interdum omnia ea simul sunt.'" (250-1)

7/10/2018

Hectoris Gothi Theodisci de rebus demographicis sententiae


hic Hector Gothus Theodiscus dixisse refertur "haud dubium est labem demographicam consilio effectam" et alia de iis qui hominum numerum refrenare uolunt ex quibus aliqui nunc duces ecclesiasticos monent. 

7/09/2018

sancti Roberti cardinalis Bellarmini de rebus politicis sententiae


sanctus Robertus cardinalis Bellarminus quem librum tertium de laicis siue saecularibus scripsit in eius libri parte septima dicit "cum [Gregorius] ait omnes homines natura esse aequales et per peccatum fieri inaequales et ideo unum ab altero regi debere, non intelligit homines natura esse aequales sapientia uel gratia sed aequales in essentia et specie humana, ex qua aequalitate recte colligitur non debere unum alteri dominari quomodo homo dominatur bestiis sed solum debere unum ab altero regi politice" et in parte sexta "hic obseruanda sunt aliqua. primo politicam potestatem in uniuersum consideratam...immediate esse a solo Deo; nam consequitur necessario naturam hominis proinde esse ab illo qui fecit naturam hominis. praeterea haec potestas est de iure naturae; non enim pendet ex consensu hominum; nam uelint nolint debent regi ab aliquo nisi uelint perire humanum genus, quod est contra naturae inclinationem. at ius naturae est ius diuinum; iure igitur diuino introducta est gubernatio, et hoc uidetur proprie uelle Apostolus cum dicit Roman. 13 'qui potestati resistit Dei ordinationi resistit.' secundo nota hanc potestatem immediate esse tamquam in subiecto in tota multitudine; nam haec potestas est de iure diuino. at ius diuinum nulli homini particulari dedit hanc potestatem; ergo dedit multitudini. praeterea sublato iure positiuo non est maior ratio cur ex multis aequalibus unus potius quam alius dominetur. igitur potestas totius est multitudinis....tertio nota hanc potestatem transferri a multitudine in unum uel plures eodem iure naturae; nam respublica non potest per se ipsam exercere hanc potestatem; ergo tenetur eam transferre in aliquem unum uel aliquos paucos et hoc modo potestas principum in genere considerata est etiam de iure naturae et diuino, nec posset genus humanum etiamsi totum simul conueniret contrarium statuere nimirum ut nulli essent principes uel rectores. quarto nota in particulari singulas species regiminis esse de iure gentium non de iure naturae; nam pendet a consensu multitudinis constituere super se regem uel consules uel alios magistratus ut patet et si causa legitima adsit potest multitudo mutare regnum in aristocratiam aut democratiam et e contrario".

6/29/2018

scholae Catholicae et temperantia


haec indagatio a Michaele Gottfried Iacoboque Kirksey acta et per Thomae B. Fordhami societatem edita importat scholarum Catholicarum discipulos quam scholarum publicarum uel aliter priuatarum discipulos maiorem temperantiam exhibuisse.

6/26/2018

quid parentium diuortiatorum filia audire uoluerit


hic Melodia Lugdunensis scribit quae uerba diuortio parentium facto audire uoluerit: "id quod inter matrem tuam et patrem factum est malum erat. nam familiae constitutae sunt ut ii inter se in perpetuum ament, sed non ita in familia tua euenit. nam familia tua te non assentiente refracta est. et nunc tibi supersunt ira et maeror quae iusta sunt. omnia ea quibus animus tuus afficitur naturalia sunt. et per ea cresces...ac florebis. nam e passione Deus gaudium eliciet. et ego tecum ambulabo."

6/23/2018

Pii papae XII sententia


in epistola encyclica titulo Summi pontificatus Pius papa XII dicit "et cum gentes ad humaniorem culturam euehantur et pro rerum uitaeque condicionibus inter se dissimiles fiant non idcirco debent humanae familiae unitatem infringere sed eandem potius familiam suis ipsarum communicatis dotibus animique ornamentis ditare itemque mutuo illo bonorum commercio quod tum solummodo efficienterque haberi potest cum uiuida ac flagrans caritas omnes eiusdem Patris filios omnesque eodem diuino cruore redemptos homines fraterno foedere coagmentat. Iesu Christi ecclesia utpote fidelissima almae diuinaeque sapientiae custos non ea pro certo nititur deprimere uel parui facere quae peculiares cuiusuis nationis notas proprietatesque constituant quas quidem populi iure meritoque quasi sacram hereditatem religiose acerrimeque tueantur. ea siquidem ad unitatem contendit superno illo amore conformatam et altam quo omnes actuose exerceantur non uero ad unam assequendam rerum omnium aequabilitatem externam tantummodo atque adeo insitas uires debilitantem. et curas omnes ac normas quae facultatibus uiribusque sapienter explicandis temperateque augendis inseruiunt quae quidem ex occultis cuiusuis stirpis latebris oriuntur ecclesia approbat maternisque uotis prosequitur si modo officiis non aduersentur quae communis mortalium omnium origo communisque destinatio imponant....diuini uerbi praecones innumeris peruestigationibus per temporum decursum summo labore summoque studio habitis ciuilem enisi sunt uariarum gentium cultum earumque instituta satius digniusque agnoscere atque sua ipsarum animi ornamenta ac dotes ita colare ac prouehere ut faciliora inibi atque uberiora Iesu Christi euangelium incrementa caperet. quidquid in populorum moribus indissolubili uinculo superstitionibus erroribusque non adstipulatur beneuole nullo non tempore perpenditur ac si potest sartum tectumque seruatur." 

quam sententiam "Iesu Christi ecclesia....communisque destinatio imponant" (duobus uerbis ultimis mutatis sed fortasse error est) citans Ioannes papa XXIII in epistola encyclica titulo Mater et magistra dicit "quemadmodum decessor noster Pius XII dilucide monet".

6/22/2018

uiri et feminae in quodam spectaculo teleuisuali


in hoc blogo titulo regum reditu narratur quid in spectaculo teleuisuali quod apud Batauos quasi Superstes est euenerit cum uiri in altera insula feminae in altera collocati essent. scilicet quia de teleuisione agitur fortasse is euentus ficticius erat. sed quid causa esse poterat cur talis euentus fingeretur?

6/18/2018

quid ad limitem fiat


de iis quae ad harum ciuitatum foederatarum limitem australem fiunt hic exponitur quod iis qui de eo auctoritatem habent e legibus unum ex his tribus eligere licet: totam familiam dimittere, et legem nouam iubere, et paruulos a parentibus separare; cf. hic.

5/21/2018

contra ludos athleticos et professionales


contra ludos athleticos et professionales multae et bonae sententiae hic exhibentur. 

5/18/2018

Catholicorum coniuges protestantistici et sacra communio


Gulielmus Iacobus cardinalis Eiik archiepiscopus Utrechtensis in hac epistola haec dicit:

"Germanorum collegii episcopalis multo maior pars suffragati sunt regulis e quibus permitteretur ut protestantista catholici coniunx si nonnullis condicionibus satis fecisset Eucharistiam sumeret....contra autem has regulas Germanorum collegii episcopalis septem participes suffragati sunt et sententiam a quibusdam curiae Romanae dicasteriis petiuerunt. e quo euenit ut Germanorum collegii episcopalis legatio cum curiae Romanae legatione in qua congregationis pro doctrina fidei praefectus inerat Romae colloqueretur. id autem quod sanctus pater respondit per congregationis pro doctrina fidei praefectum Germanorum collegii legationi datum, scilicet quod oportet collegium iterum de litteris emendabilibus colloquium agere et si fieri possit omnium consensu decernere conari, intellegi nullatenus potest....ea quae in iuris canonici codice et ecclesiae catholicae catechismo dicuntur respondere sanctum patrem oportebat, qui utpote sancti Petri successor est 'unitatis tum episcoporum tum fidelium [multitudinis] perpetuum ac uisibile principium et fundamentum' (Lumen gentium 23). sanctum patrem oportebat Germanorum collegii episcopalis legationi regulas claras e doctrina ecclesiae clara moreque tractas dare. ita respondere eum oportebat etiam feminae Lutheranae quae anno 2015 mensis Nouembris die 15 eum rogauerat utrum sibi cum coniuge Catholico communionem suscipere liceret, ac dicere hoc acceptabile non esse potius quam monere ei quippe quae baptizata esset et si e conscientia actura esset communionem suscipere licere. quali defectione claritas non efficitur e tali defectione infertur magna confusio fidelibus et ecclesiae unitas in periculo ponitur."

4/20/2018

duces Christiani Syriaci et impetus recens


hae sunt quorundam ducum Christianorum Syriacorum de Americanorum et Britannorum et Francorum impetu recenti sententiae, e quibus secundam praesertim noto: "nobis magno dolori est hic impetus a ciuitatibus potentibus quibus Syria nihil ullo modo nocuit factus."

4/18/2018

Nouum Eboracum anno 1911


hic est cinematulum de Nouo Eboraco sicut anno 1911 erat.
 

4/16/2018

carmina Zeldalia


carmen principale hic et hic (4:35-6:18) est.

labyrinthi carmen hic est.

ludi primi carmen finale hic est.

ludi secundi carmen initiale hic est.

palatii carmen hic est. 

piscis uentosi carmen hic et hic et hic est.

Zeldae carmen soporiferum hic est.

mundi tenebrosi carmen hic et hic est.

4/12/2018

quinque quaestiones quae potius quam "quid agis?" poni possint


in hoc tractatu disseritur de his quinque quaestionibus quae potius quam "quid agis" (uel fortasse post) poni possint:

1. quae diei tui pars optima erat? (uel mane "quid de hoc die auidissime exspectas?")

2. quod opus hac septimana te maxime excitat?

3. quae consilia noua iamdudum te mouent?

4. dic mihi unum quod nuper cognitum te inspirauit.

5. quid est unum quod hic et nunc facere possimus quo hic (dies, opus, celebratio) quam est melior fiat?  

4/04/2018

linguae in Heluetia

hic disseritur de linguis quae in Heluetia in usu sunt.

3/26/2018

liber ecclesiasticus de feminis


mulieris bonae beatus uir;
numerus enim dierum illius duplex.
mulier fortis oblectat uirum suum
et annos uitae illius in pace implebit.
pars bona mulier bona;
in parte timentium Deum dabitur uiro pro factis bonis.
diuitis autem uel pauperis cor bonum;
in omni tempore uultus illorum hilaris.
a tribus timuit cor meum,
et de quarto facies mea metuit:
delaturam ciuitatis et collectionem populi
calumniam mendacem super mortem omnia grauia;
dolor cordis et luctus mulier zelotypa in mulierem
et flagellum linguae omnibus communicans.
sicut boum iugum quod mouetur ita et mulier nequam;
qui tenet illam quasi qui apprehendat scorpionem.
mulier ebriosa ira magna et contumelia,
et turpitudo illius non tegetur.
fornicatio mulieris in extollentia oculorum
et in palpebris illius agnoscetur.
in filia peruicaci firma custodiam
ne inuenta occasione utatur sibi.
ab omni irreuerentia oculorum eius caue
et ne mireris si te neglexerit.
sicut uiator sitiens ad fontem os aperiet
et ab omni aqua proxima bibet
et contra omnem palum sedebit
et contra omnem sagittam aperiet pharetram donec deficiat.
gratia mulieris sedulae delectabit uirum suum,
et ossa illius impinguabit disciplina illius.
datum Dei est mulier sensata et tacita;
non est commutatio eruditae animae.
gratia super gratiam mulier sancta et pudorata;
omnis autem ponderatio non est digna continentis animae.
sicut sol oriens mundo in altissimis Dei
sic mulieris bonae species in ornamentum domus eius.
lucerna splendens super candelabrum sanctum
et species faciei super staturam stabilem;
columnae aureae super bases argenteas
et pedes speciosi super plantas stabiles mulieris.
fundamenta aeterna supra petram solidam
et mandata Dei in corde mulieris sanctae.
in duobus contristatum est cor meum,
et in tertio iracundia mihi aduenit:
uir bellator deficiens per inopiam
et uir sensatus contemptus
et qui transgreditur a iustitia ad peccatum;
Deus parabit eum ad romphaeam.
duae species difficiles et periculosae mihi apparuerunt:
difficile eruitur negotians a neglegentia,
et non iustificabitur caupo a peccatis. (26.1-28)


filia patri est abscondita uigilia,
et sollicitudo eius aufert somnum:
in adulescentia sua ne forte adulta efficiatur;
uiro nuptum locata ne odibilis fiat;
ne quando polluatur in uirginitate sua
et in paternis suis grauida inueniatur;
ne forte uiro desponsata transgrediatur
aut cum eo commorata ne sterilis inueniatur.
super filiam immodestam confirma custodiam
ne quando faciat te in opprobrium uenire inimicis
in detractionem in ciuitate et obiectionem plebis
et confundat te in multitudine populi.
omni homini ne det speciem
et in medio mulierum non commoretur;
de uestimentis enim procedit tinea,
et a muliere iniquitas mulieris. (42.9-13)

3/13/2018

cur lingua Latina discenda sit


hic Anna Holmquist refert quantum radices et particulas additiuas Latinas discere ad Anglice legendum prosit.

hic autem Francisca Thomasina cui animus discendae linguae Latinae utilitatibus non tenetur dicit "inest animi elatio quoque creatiua operi Anglice transformandae linguae Latinae" et "omnis sententia Latina mysterium est quod soluatur, et translationis gaudium...pollicetur uitam solui et in aliquid nitidum ordinatumque recomponi posse" et "ad linguam Latinam tu non attines; ne actu quidem es. linguae Latinae operam dare exercitio in egotismi mortem est."

3/07/2018

Camillae Paliae sententiae


Camilla Palia in libro primo de personis sexualibus in paginis 37-8 dicit "eorum quae uiri effecerunt catalogum epicum facere possumus....si cultus humanus in manibus femininis relictus esset etiamnunc casas gramineas habitaremus."

hic notat quantum momentum historiae scientia habeat: "credo re uera esse quae uera et solida de uitae humanae 10,000 annis superioribus sciri possint et debeant".

2/19/2018

societates commerciales ueterrimae

ut hic refertur, deuersorium Iaponicum nomine Nissiyama Onsen Keiunkan anno Domini 705 conditum societas commercialis ueterrima esse dicitur, et societas Finnica nomine Stora Enso societas obnoxietatis limitatae incorporata ueterrima.

2/05/2018

"Iedi ultimi" pars optima

quae Iedi ultimi pars sola bona est, ea pars in sedecim particularum modo hic et modo Legoico hic spectari potest.

1/31/2018

mutua uiri et uxoris officia e catechismo Romano II.8.25-27


uerum, ut haec sancta societas sine querela facilius conseruetur, uiri et uxoris officia quae a sancto Paulo et a principe apostolorum Petro descripta sunt tradenda erunt.

ergo uiri munus est uxorem liberaliter et honorifice tractare. qua in re meminisse oportet Euam ab Adamo sociam appellatam esse cum inquit 'mulier, quam dedisti mihi sociam.' cuius rei causa aliqui patres factum esse docuerunt ut ea non ex pedibus sed ex latere uiri formaretur, quemadmodum etiam ex capite condita non est ut se uiri dominam non esse intelligeret sed uiro potius subiectam. decet praeterea uirum in alicuius honestae rei studio semper occupatum esse tum ut ea suppeditet quae ad familiam sustentandam necessaria sunt tum ne inerti otio languescat a quo uitia fere omnia fluxerunt deinde uero familiam recte constituere omnium mores corrigere singulos in officio continere.

rursus autem uxoris partes sunt quas apostolorum princeps enumerat cum inquit 'mulieres subditae sint uiris suis ut et si qui non credunt uerbo per mulierum conuersationem sine uerbo lucrifiant considerantes in timore sanctam conuersationem uestram quarum non sit extrinsecus capillatura aut circumdatio auri aut indumenti uestimentorum cultus sed qui absconditus est cordis homo in incorruptibilitate quieti et modesti spiritus qui est in conspectu Dei locuples. sic enim aliquando et sanctae mulieres sperantes in Deo ornabant se subiectae propriis uiris sicut Sara oboediebat Abrahae dominum eum uocans.' earum quoque praecipuum studium sit filios in religionis cultu educare domesticas res diligenter curare. domi uero libenter se contineant nisi necessitas exire cogat idque sine uiri permissu facere numquam audeant. deinde in quo maxime maritalis coniunctio sita est, meminerint semper secundum Deum magis quam uirum neminem diligendum eoue pluris faciendum esse neminem cui etiam omnibus in rebus quae Christianae pietati non aduersantur morem gerere et obtemperare summa cum alacritate animi oporteat.

1/24/2018

conferentia episcoporum Catholicorum ciuitatum foederatarum et quaedam societates

in hac epistola conferentia episcoporum Catholicorum ciuitatum foederatarum et praeses societatis nomine subsidiorum Catholicorum petunt ut pecunia duabus aliis societatibus quae quaedam doctrinae Catholicae contraria agunt detur. quae autem societates res doctrinae Catholicae contrarias agunt iis societatibus pecuniam non dari oportet.

1/22/2018

scientia logica et computatra

hic Christophorus Dixon de scientia logica et computatris disserit et quomodo utrumque ad alterum se habeat, praesertim quod Georgius Bulus a cuius opere Claudii Sannonis opus et scientia computatralis oritur ipse Aristotelis opere utens hoc in animo habebat ut id quod Renatus Cartesius in geometria fecerat id est pro uerbis notationem algebraicam ponere in scientia logica faceret.

1/09/2018

Ludouici Nigri archiepiscopi sententiae


hic Ludouicus Niger archiepiscopus dixisse refertur:

"decenniis proximis ecclesia...ingressa est cliuum quo eo fertur ut se antichristianismi ui petulanti dedat; sentiendi modo dominanti concedit."

"Franciscus papa quasi putandi modi dominantis instrumentum adhibetur....nunc est coniuentia cuiusdam Christianismi et conuictus laicistici, cui ecclesia nunc negare non posse uidetur."

"oportet modum quo aduenae conuictus participes fiant rationalem esse, nec portae aperiri possunt quasi conuiuium esset nisi clarissime ostendatur quo impendio rerum oeconomicarum humanarum culturalium aduentus aduenarum stet."

"hominum diuersorum susceptionem...non immoderate agi oportet; nam si immoderate agatur eo ferat ut conuictus noster obrutus pereat."  

"ecclesia et fidei cultores sibi Christi contra abusus defendendi officium suscipere debent."

"Iesu in Bethlehem e Maria nati historia uera est et ut talis sic colitur nec mythus est qui ad rem tempore et loco definitam redigatur et in consilia aliena adhibeatur, id quod quidam dicti philosophi fecerunt....septimanis proximis ortus erat mos quo aduenae diem festum potius quam Christi natiuitatem colere uidebamur."

"re uera diffusa est idea sodalitatis Catholicae distorta, quae locum primum solummodo problematibus publicis dat ut ea statim solutionibus quas a sentiendi modo dominanti impositas non a nostri sensu nostro accepit aggrediatur."

"inde fit ut omnes iidem fiant, id quod oeconomiae globalificatae grandi fauet, in qua oeconomia inter alia hoc appetitur quod ordine operariorum ex aduenis creato laboris pretium diminuatur."

1/08/2018

conferentia episcoporum Catholicorum ciuitatum foederatarum et profugi uel aduenae


ut exempli gratia hic disseritur, haec septimana migrationis nationalis appellatur.

ut autem hic in pagina 14 uideri potest, exempli gratia annis 2015 et 2016 conferentia episcoporum Catholicorum ciuitatum foederatarum 81 x 10^6 et 95 x 10^6 thaleros a politia foederali ad collocandos profugos uel aduenas accepit.

12/11/2017

Roberti cardinalis Sarae de multiculturalismo et aliis rebus sententiae


Robertus cardinalis Sara dixisse hic refertur "quomodo demi possunt populi iura quibus internoscatur profugus qui causa politica uel religionali a patria fugere cogatur et aduena qui causa oeconomica adueniens domicilii locum mutare uelit sed neque ad cultum ciuitatis quam habitet se accommodare neque eius participem se exhibere neque eum suscipere?" "eo magis (quomodo id fieri potest) si hic aduena aliam religionem et cultum habet et praetenditur ut quae res dignitatem absolutam habet id est populi salus communis ea res ad dignitatem relatiuam redigatur?" "iterum dico oportere nos cooperari ut quibus ciuitatibus accidit ut eae belli et morum corruptorum et iniustitiae uictimae fiant eas ciuitates reaedificemus, sed inde non sequitur ut oporteat nos eradicandorum populorum et delendarum ciuitatum auctores esse. nonnulli et Dei uerbo abutuntur ut multiculturalismi promotionem iustificent et hospitii excusationem commodo suo hilariter adhibent ut aduenarum susceptionem iustificent." et hic "indiuidualismi liberalistici ideologia fouet mistionem quae et fingitur ut patriarum et cultuum fines naturales erodat, et fert ad mundum postnationalem et unidimensionalem ubi nil nisi consumptio et fructificatio ullius habeatur."

11/29/2017

quaedam sancti Ioannis apostoli sententia


"omnis qui ultra procedit et non manet in doctrina Christi Deum non habet; qui permanet in doctrina hic et Patrem et Filium habet. si quis uenit ad uos et hanc doctrinam non affert nolite accipere eum in domum nec 'aue' ei dixeritis; qui enim dicit illi 'aue' communicat operibus illius malignis." (epistola 2.9-11)

11/25/2017

sanctus Thomas Aquinas et actiones intrinsece malae


ut hic refertur, sanctus Thomas Aquinas de iis quae facere numquam licet disserit:

"primo quidem...praecepta negatiua sunt magis uniuersalia et quantum ad tempora et quantum ad personas. quantum ad tempora quidem quia praecepta negatiua obligant semper et ad semper. nullo enim tempore est furandum et adulterandum. praecepta autem affirmatiua obligant quidem semper sed non ad semper sed pro loco et tempore; non enim tenetur homo ut omni tempore honoret parentes sed pro loco et tempore. quantum ad personas autem quia nulli hominum est nocendum; non autem sufficientes sumus ut unus homo possit omnibus hominibus seruire." (super epistolam beati Pauli ad Romanos 13.2)

"tunc in praeceptis debet fieri dispensatio quando occurrit aliquis particularis casus in quo si uerbum legis obseruetur contrariatur intentioni legislatoris. intentio autem legislatoris cuiuslibet ordinatur primo quidem et principaliter ad bonum commune, secundo autem ad ordinem iustitiae et uirtutis secundum quem bonum commune conseruatur et ad ipsum peruenitur. si qua ergo praecepta dentur quae contineant ipsam conseruationem boni communis uel ipsum ordinem iustitiae et uirtutis huiusmodi praecepta continent intentionem legislatoris et ideo indispensabilia sunt." (summa theologiae IaIIae100.8)

11/20/2017

sancta Missa Latina in Nigeria

hic apud Principia Eduinus Maria Acaedus disserit quomodo sancta Missa Latina in Nigeria se habeat.

10/16/2017

ultimum supplicium


praeter illa quae antehac imposui, etiam haec: 

Lucas euangelista: "respondens autem alter [latro] increpabat illum dicens 'neque tu times Deum, quod in eadem damnatione es? et nos quidem iuste; nam digna factis recipimus.'" (23.40-41)

Innocentius papa I: "quaesitum etiam est super his, qui post baptismum administrauerunt et aut tormenta sola exercuerunt aut etiam capitalem protulere sententiam. de his nihil legimus a maioribus definitum. meminerant enim a Deo potestates has fuisse concessas et propter uindictam noxiorum gladium fuisse permissum et Dei esse ministrum uindicem in huiusmodi datum. quemadmodum igitur reprehenderent factum quod auctore Deo uiderent esse concessum? de his ergo ita, ut hactenus seruatum est, ne aut disciplinam euertere aut contra auctoritatem Domini uenire uideamur. ipsis autem in ratione reddenda gesta sua omnia seruabuntur." (epistola 6.3.7-8 in patrologia Latina 20.499A-B)

catechismus Romanus: "alterum permissum caedis genus est quod ad eos magistratus pertinet quibus data est necis potestas qua ex legum praescripto iudicioque in facinorosos homines animaduertunt et innocentes defendunt. quo in munere dum iuste uersantur non modo ii caedis non sunt rei sed huic diuinae legi qua caedes uetatur maxime oboediunt. cum enim legi huic finis is propositus sit ut hominum uitae salutique consulatur magistratuum item qui legitimi sunt scelerum uindices animaduersiones eodem spectant ut audacia et iniuria suppliciis repressa tuta sit hominum uita. quare Dauid 'in matutino' inquit 'interficiebam omnes peccatores terrae ut disperderem de ciuitate Domini omnes operantes iniquitatem.'" (3.6.4)

Pius papa XII: "quando de hominis morte condemnati interfectione agitur ne tunc quidem ciuitas indiuidui ius uitae demit. nam tunc potestati publicae proprium est hominem condemnatum uitae bono in culpae expiationem priuare cum iam scelere suo se uitae iure priuauit" (acta apostolicae sedis 1952, p. 787; Anglice hic)

etiam hic et hic.

10/12/2017

Thomae Creani sacerdotis de Amoris laetitia adhortatione apostolica sententiae

ut hic refertur, Thomas Creanus sacerdos ordinis praedicatorum disserit cur "quamquam sancti Thomae [Aquinatis] operum multi et uarii loci in Amoris laetitia citantur tamen dicere non possim me existimare quod eae citationes...eorum quae doctor angelicus de amore coniugali uel passionibus uel uetitionibus moralibus uniuersalibus uel sacrae communionis a peccatoribus publicis sumptione docuit expositionem fidam praebeant."

8/30/2017

Ignatii Zambiti episcopi Pactensis emeriti de aduenis Mahumetisticis sententiae


Ignatius Zambitus episcopus Pactensis emeritus hic ad quaestiones sic respondisse refertur.

Q: "excellentia, fitne impetus in populos occidentales?"

R: "fit impetus in Europam in populos occidentales et certe in fidem Christianam....hodie saecularismus et hedonismus et relatiuismus faciunt ut nostri sensus noster progressiue diruatur, et hoc Mahumetismum corroborat."

Q: "estne Mahumetismus religio pacifica?"

R: "nullatenus religio pacifica est....scilicet omnes Mahumetistos terroristas esse dicere non possumus nec debemus quidem, sed certum est quod omnia ea scelera in Mahumetismi nomine fiunt. bellum religiosum est. sunt etiam Christiani improbi--cur non--, sed hoc tempore homicidas qui Iesu nomen adhibentes uel clamantes scelera faciant non uidi. porro euangelium misericordiae et pacis et ueniae textus est, qui ab eo quem Alcoranus refert ualde differt."

Q: "non fieri non potest ut omnia haec nobis ad immigrationis thema animum aduertant. possumusne omnes suscipere?"

R: "non possumus. fortuna bona Bassettius cardinalis nuper dolum et certe ideologicas theses quae etiam ecclesiae insunt iuste correxit. susceptio quae caritas est sapienter et prudenter legum respectu agitur. ut summam faciam, ordine agatur, et is qui huc uenit se regulis nostris et cultui et mori maiorum adaptare debet. exempli gratia mihi animus confunditur quod nonnulli aduenae, sicut nuper Neapoli factum est, uigiles publicos circumdare uel minari impune possunt. illi autem ad defendendos se et ordinem publicum contra agendi ius habebant. sed timeo ut illi ita fecerint, id quod in regione normali factum esset, quia si quid egissent, quod ius habebant, euenisset ut legis protectores sed non uiolentiae auctores in carcere essent."

Q: "existimasne hodie patere quid ecclesia de Mahumetismo doceat?"    

R: "hoc solum dico Benedictum XVI maiorem claritatem exhibuisse et illam eius lectionem Ratisbonensem quasi miliario insuperato esse. uera dixit."

Q: "suntne aduenae opibus et occasioni felici?"

R: "opibus non sunt et etiam minus occasioni felici. saltem hoc modo. tales fieri possent si re uera ciuitatis participes fieri uellent. sed maior pars eorum ciuitatis participes fieri aspernantur. quotiens superbe cibum ab uoluntariis oblatum abiiciunt! uel dicunt se Italiae pigere. mihi uidentur nullatenus ciuitatis participes fieri in animo habere, et tum de quibus opibus loquimur?"

Q: "suntne etiam in ecclesia ii qui [aduenarum] susceptionem profiteantur?"

R: "ecclesia magnum corpus est, et ex omnibus constat. fieri potest, neque existimo fieri non posse ut etiam inter nos sint qui susceptionem profiteantur, quae susceptio ualde lucrosa et commoda est."

ad haec pertinent etiam ea quae Philippus Villariensis hic dixisse refertur.