artium renatio et hac aetate institutio

 

Antonius Esolenus philosophiae doctor hic artium renatarum aetatem interpretatur imitandamque proponit: "artium renatarum aetatis praeclaritas non ex modorum mediaeualium reiectione, quamquam aliquid talis reiectionis factum est, sed ex eorum quae ante illos modos lecta cogitata facta erant recordatione et instauratione orta est. ea aetas a tempore praeterito non quasi a radicibus se separauit...omnes ex mundi antiqui fontibus siue paganis siue Christianis bibebant....animum illo mundo antiquo captum habentes et illi gratias agentes et illum imitantes numquam simpliciter illum indagabant uel partem agebant sed discere cupiebant....ergo dico in ecclesia iam praeterisse tempus quo instauratione indigere coeperimus....uolumusne efficere ut scholae paroeciales et dioecesanae in operatione permaneant? instaurate amissa institutionis liberalis elementa."

Iacobus Ioannides quoque autem philosophiae doctor hic in Principiis artium renatarum aetatem et homines discendi cupidos tractat. nam dicit "hominibus qui discere cupiunt solus necessarius est praeceptor scientia plenus qui eos ad libros quos ii legere cupiunt dirigat et ad excitandum studium auxilietur. ab iisdem cupitur cursus forma qua iis ad imponendum studio aliquem ordinem auxilium detur et cupiuntur comites concordes quibus eadem studio sunt et de litteris philosophiaque colloqui placet. a praeceptoribus autem soli cupiuntur discipuli quidem qui libros amant de librisque colloqui cupiunt satis autem reditus pecunarii quo ipsi sibi theam et placentas suppeditent." et de eo qui artium renatarum pater saepe dicitur Francisco Petrarca Iacobus dicit "saeculo decimo quarto eo quod poesim et historiam et philosophiam moralem septem artibus liberalibus addidit studia humanitatis condidit" sed simul Franciscus aetatis suae homines barbaros esse existimabat. 

hodie autem sunt--eheu!--ii qui linguam Latinam oderunt, de quibus Carolus Maria Vicanatus archiepiscopus hic haec Prosperi Guerangeri uerba memorauisse refertur: "linguae Latinae odium omnium Romae inimicorum cordibus ex eorum natura inest" quae uerba etiam in eo blogo qui "Rorate caeli" dicitur inueniri possunt et ad Ioannis Zulsdorfi sacerdotis has litteras pertinet.

interim de artium renatione est etiam hoc.

martyres Gorcenses

Ioannes Zulsdorfus sacerdos hic hunc Gregorii Pippii tractatum laudat. etiam est hoc.

martyres Vgandani

Ioannes Zulsdorfus sacerdos hic narrat.

Ionathas Liudulfus hic narrat.

Megana Venatrix Cilmera hic narrat.

Zubairus Simonides hic narrat.

Anna Bernarda hic narrat.

patres

 

ex hoc tractatu sententia memoria digna: "quomodo sacerdotes maxime efficiunt ut familias adducant? per patres. nam patres Deus familiis praefecit. ad Eius autem sapientiam aeternam ut redeamus et patres fidem in familia ducturos reponamus necesse est."

Vcraina et hae ciuitates foederatae

 

argumentationum quas adiuuandae Vcrainae causa expositas audiui optima est haec ab Ioanne Montio philosophiae doctore scripta, quamquam etiamnunc puto Vcrainae et Russiae rem ad has ciuitates foederatas nullatenus pertinere.

ad illum tractatum Maximus Gregoriades hic respondet.

Biblia sacra

 

memoratur hic utrum moechae historia ex origine in Ioannis euangelio fuerit et utrum Danielis libri partes Graece scriptae sint, cf. hic et hic.

Iosephus cardinalis Zen

 

hoc lecto Dauidi Altoni consentio quod Iosephus cardinalis Zen hoc tempore inter rerum diuinarum duces praeclarissimus est.

Ioannes baptista

 

ex hoc Matthaei Plesii tractatu didici quod Ioannes baptista in matris utero peccato originali purgatus esse hic refertur et plerumque existimatur. etiam, ut Matthaeus dicit, in fide Catholica trium hominum solorum dies natales in liturgia coluntur Iesu Christi et Mariae Dei matris et Ioannis baptistae qui soli sine peccato originali nati sunt.

communistae in Cuba

eheu, communismus non in Sinis solis etiamnunc uiuit; nam in Cuba quoque communistae mala faciunt, ut hic refertur quomodo uir qui politiae non fauet tractetur.

scholae Catholicae

lamentabile est quando scholae Catholicae ea quae erronea uel in scholis publicis fiunt uel in docendi scientia speculatiua cogitantur sibi assumunt, ad quam rem pertinet hic tractatus in Principiis.

de institutione liberali Euae Brannae sententiae

 

quod ad institutionem liberalem pertinet, de libris praeclaris Eua Branna hic disserit: "librorum praeclarorum studium....facit ut quod nos fore propositum est id simus deinde in ea uita sic effecta nos sustinet." "discendi actus praecipue illis libris praeclaris efficitur....in ea quae nobis tradita sunt initiationis....consecutionem hi libri lecti afferunt. ea autem quae nobis tradita sunt hic dico non consuetudines et usus quibus homines sine cogitatione se addicant sed ea opera quorum pleraque sed non omnia libri sunt quae nobis tradita sunt non ut temporis praeteriti ac remoti reliquiae sint sed ut uiua adsint....haec tradita hominibus ad tempus se habentibus ut radices plantis ad locum se habentibus sic et fundamento et alimento sunt. nam nobis scaenam et basim dant" "institutio nostra sibi causa finalis est" "hae tres [sunt] partes firmae...omnis institutionis quae uitam meliorem faciat: [primum] discere legere mundumque per libros praeclaritatisque ductu interpretari [et secundum] iis quae tradita nos id quod sumus fecerunt nos conectere et [tertium] ex eius quod discendum est amore discere."

id quod Anglice "by-product" dicitur

 

cognoscere conans quomodo id quod Anglice "by-product" dicitur Latine dici possit ad hunc Marci Tullii Ciceronis locum ductus sum: "ut enim cum cibo et potione fames sitisque depulsa est ipsa detractio molestiae consecutionem affert uoluptatis sic in omni re doloris amotio successionem efficit uoluptatis" (de finibus 1.11.37)

adorationis lingua

 

Antonius Esolenus philosophiae doctor hic (cf. hic liber): "per totam uitam audiui quod ut Iesus sermone patrio suo precatus est sic nos nostro precari oportet" sed "si Iesus apostolique in cena ultima psalmum cecinerunt poema non simpliciter Hebraicum erat sed linguae Hebraicae generis poetici quod linguae Hebraicae genus non erat id quod quando psalmi componebantur tum in historiis uel uiis publicis adhibebatur."

praeceptricis sententiae

Anna Bernarda hic feminae quae in schola Catholica docet epistolam imponit. femina dicit "Spiritum Sanctum quotidie mane oraui ut ea quae mihi docenda Deus constituerat sola et in ueritate docerem non respiciens quid inde euenturum esset (et hoc quoque iuuit quod Iesum et Mariam et sanctum Michaelem rogabam ut in didascaleo meo essent ullum malum didascaleo meo prohibituri) et contra id quod uerum est argumentatio fieri non potest; nam uerum est. scin quid euenerit? discipuli lectiones meas AMABANT."

de Georgio Bergolio Ioannes Hunuicus sacerdos

 

ut Ioannes Zulsdorfus sacerdos in blogo suo refert, Ioannes Hunuicus sacerdos de Georgio Bergolio hic disseruit: "cur Franciscus papa id fecit? quid erat omnis illius crudelitatis causa?....hic erat uir qui ecclesiam uniuersalem et ea quae in fide deposita sunt ut infans cui res oblectaneae ludendi causa datae erant uel puer magnus et turbidus cui iis rebus saeuius ludere placebat sic tractabat....uir qui in intimo se timore consumebatur; nam illius qui eruditus ante eum papa fuerat et illorum cardinalium qui dubia proposuerant eruditionem timebat; clericorum pauciores annos habentium ac praecipue tradita colentium deuotionem timebat; uir qui ut ii quibus plerisque terrorem aliis inicere placet sic in essentia timidus erat."

sancti Petri basilica prior

qualis uisu sancti Petri basilica prior fuerit hic (idem hic) est cinematium et hic est imago.

sancta Ioanna uirgo Aurelianensis diesque festus suus

quomodo sancta Ioanna in ecclesia cathedrali Aurelianensi colatur hic disseritur.

Ludouicus Bouarius sacerdos

 
de eo in Ioannis Zulsdorfi sacerdotis blogo hic et in blogo qui ad musica sacra pertinet hic et Petrus Quasneuius philosophiae doctor hic.

ii qui se democratistas appellant et uiri

  

ii qui in his ciuitatibus foederatis se democratistas appellant hic et hic referuntur quaerere "quomodo iuuenes nobis conciliare possumus?" 

simul, ut hic et hic refertur, ex regulis progressiuisticis in pueros qui puellam in apodyterio suo esse nolebant agitur inquisitio de uexatione sexuali.

porro de conciliandis uiris locuturus procedit Petrus Buttigigius. o uos qui democratistae appellamini, nescitisne quod uiri ex natura homosexualitatem eiusque cultores detestantur defugiunt deuitant? ipse autem Petrus hic refertur dixisse quod Donaldi Trumpi fautores "ea quae uere eis [uiris uel fortasse praesertim iuuenibus] prosunt non curant; nam pornographiam uetare uolunt." o Petre, nos bene formati uiri scimus pornographiam nec nobis nec cuiquam prodesse. quid in te prauum est ut pornographiam prodesse existimes? an iocaris? si autem iocaris, quod uiri uel iuuenes Donaldo Trumpo suffragantes contra se agunt dicere non potes.

Gulielmus Caesar II

 

multa quae de Gulielmo Caesare II numquam antehac audiui Andreas Lombardus in Principiis hic refert: quod ille Ottoni Bismarcensi qui imperium suum generis noui esse arbitratus erat dissentiens imperium a Roma translatum existimabat; regum Borussicorum primus et ultimus pontificem summum uisitauit; fidei Catholicae cultoribus tot et tanta bona faciebat ut eius frater et procurator rerum externarum timerent ne ipse fidem Catholicam colere inciperet.

quae his diebus fiunt

 

cur huic thesi, quod custodiae modi moderni tam efficaces sunt ut poena mortis necessaria non sit, non assentiar: nam, ut hic refertur, decem uiri qui in carcere tenebantur effugerunt. neque ego, ut Timotheus Flandrianus hic exponit, ut illi thesi quam Ioannes Paulus papa II proposuit assentiar ita obligor. 

Petrus Quasneuius philosophiae doctor hic disserit: "sunt scholarum Catholicarum milia quae linguam Latinam docere possint sed non docent propterea quod ea parui uel nihili habetur. haec autem ignorantia uel scepticismus uel eorum quae nobis tradita sunt recusatio est problema uerum; haec est sententia quam mutari oportet."

Ioannes Zulsdorfus sacerdos de Roma et eius ecclesiis

hic de ecclesia sancti Andreae

 

hic de ecclesia sancti Iuonis

 

hic de ecclesia sancti Laurentii

 

hic et hic et hic et hic de ecclesia sanctae Mariae ad martyres (etiam Gregorius Pippius hic)

 

hic de ecclesia sanctae Mariae Exquilina

hic de ecclesia sanctae Mariae in Monte Serrato

 

hic de ecclesia sanctae Mariae supra Mineruam

 

hic et hic de ecclesia sanctissimi nominis Iesu

 

hic de ecclesia sancti Siluestri

 

hic de ecclesia sancti Angeli

Europaei Mahumetanis se subiciunt

 

refertur de Anglia hic et de Dania hic.

aliqua quae in his ciuitatibus foederatis fiunt

hic de hominibus politicis aeroplanisque et hic de ludis feminarum athleticis et hic de uniuersitatis Columbianae discipulo propter fidem Catholicam persecutionem patienti.

quomodo et quales papae electi sint

 

disserit Edmundus quidem Mattea philosophiae doctor hic de Innocentio II Anacletoque II Ioannes autem Raus philosophiae doctor hic praesertim de Graecis qui saeculis septimo octauoque ecclesiam regentes theologi erant et de imperatoribus Ottone I Ottone III Henrico III et de Paulo papa III Pauloque papa IV Pioque papa VII Gregorius autem Pippius hic de schismo occidentali.

sanctus Pius papa V

 

quomodo sanctus Pius papa V missale Romanum reformauerit Lucas Viridarius hic disserit.

Anna Bernarda autem hic argumentatur Pio papae V Georgium Bergolium quippe qui illi missali aduersatus esset et Mahumetanis peruersitatisque uenereae cultoribus fauisset contrarium fuisse.

de eo quod est uisitare

de Lucae euangelio 1.68 Ioannes Maldonatus in commentariis dicit "quia uisitauit. liberauit redemit ut statim sequitur. Hebraismus est qui et in bonam et in malam partem accipi solet. cum in bonam accipitur significat beneficio aliquem afficere aut afflicto opem ferre miserum liberare aut redimere....cum in malam sumitur partem significat e contrario affligere poenas quasi iudicem ab aliquo exigere"

quomodo ciuitates inter se se gerant

 

quomodo ciuitates inter se se gerant et quid de ea re Donaldus Trumpus ministrique faciant R. R. Reno ut in Principiis exponit intellegit.

lingua Latina in cruce

inter alia hic hoc memoratur: "linguae Latina et Graeca et Hebraica sacrae sunt....[nam] quod signum Pontius Pilatus cruci adfixit in eo signo adhibitae sunt ut pronuntiaretur quis Iesus Christus esset (Ioan. 19.19-20). crux autem Christianis inter omnes res gestas quasi ei loco est quo animum maxime intendi oporteat. ibi autem linguae Latina et Graeca et Hebraica sunt."

tamen admiror utrum lingua Hebraica adhibita sit an Aramaica. nam, ut hic refertur, in Testamento Nouo lingua Aramaica Hebraica appellari solet.

lingua Latina in eruditione

Timotheus Flandrianus hic argumentatur: "si ritus Romani theologus es sed Latine facundus non es, theologiae gradum primum non superauisti. cur? propterea quod sapientiae textus theologici innumerabiles numquam ex lingua Latina in aliam linguam redditi sunt. si theologia est sapientiae uita sed hos textus quippe quorum linguae ignarus es legere ne potes quidem, quomodo te theologum dicere potes?"

eius autem sententiam ego sic extendere uolo: "si in mundi regione occidentali eruditus es sed Latine nescis, scholaritatis gradum primum non superauisti. cur? propterea quod textus occidentales innumerabiles Latine legi oportet. si scholaritas est legendi uita sed hos textus quippe quorum linguae ignarus es ut scripti sunt sic legere ne potes quidem, quomodo te scholarem dicere potes?" 

trium iconoclasmorum et trium pornocratiarum expositio

 

quod facti sunt tres iconoclasmi in imperio Constantinopolitano et inter eos qui se bibliis sacris solis fidere dicebant et post concilium Vaticanum secundum, sententia exempli gratia hic et hic et hic et hic et hic memoratur.

quod ortae sunt tres pornocratiae saeculo decimo et artium renascentium aetate et ex saeculo priore ad hoc hic dicitur.

uiri et feminae

 

Maria Elisabetha Bonaccia hic et hic de cerebro uirili et cerebro femineo disserit.

Oliuia Ioannis hic de officiis coniugalibus disserit.

e parte contraria, ut hic refertur, quaedam femina quae potestatem politicam in Pennsiluania obtinet inter eos "qui quam ualida et celeria et potentia corpora uirilia sint tam ualida et celeria et potentia corpora feminea esse credunt" se profitetur, qua professione demonstrat se deceptam uel mendacem esse.

Gabrielis Mariam alloquentis imagines

multas hic Ioannes Zulsdorfus sacerdos imposuit.

Mons Casinus

 

monasterii imagines hic et hic Gregorius Pippius imposuit.

"Ligulae Chrononicae" ludi electronici carmina

 

anni 600 carmen a Phoenice Arco Angelo hic et a chordacistarum tetrade hic et a Columbio Robertulio hic et technoice hic est. 

 

contra Lauum pugnae partis secundae carmen hic est. 

 

magice obseratae ianuae carmen a Columbio Robertulio hic et a chordacistarum tetrade hic et a Ponto Hultigreno hic est. 

 

regni Zelii carmen clauicinio eminente hic et a Zidano Tribali hic et a Columbio Robertulio hic et uiolino solo hic et tintinnabulo eminente hic et a chordacistarum tetrade hic et annorum 1981-1990 modo hic et eodem genere hic et a Ponto Hultigreno hic est. 

 

Schalae carmen a Columbio Robertulio hic et chordis tintinnabuloque eminentibus hic et a Phoenice Arco Angelo hic et a Ponto Hultigreno hic et ab Leone Nocte hic et alio modo hic est.

 

carmen principale a Ponto Hultigreno hic et a chordacistarum tetrade hic est.

multa carmina modo electronico hic et annorum 1981-1990 modo hic sunt.

ordo oeconomice medius et lingua Latina

 

ea quae de lingua Latina in Britanniae scholis fieri hic narrantur huius exemplo sunt quomodo qui ordo in rebus oeconomicis medius dicitur eum ordinem progressiuistae delere uelint agantque quandam superbiam qua existiment eos qui in ordinibus consortii humani inferioribus sunt studiis sublimioribus uti uel frui non posse. de usu autem linguae Latinae quomodo ea mentem acuat et sapientiae thesauros aperiat hic disseritur.

quomodo hae ciuitates foederatae erga alias ciuitates se gerant

 

quod Patricius Buchananus arbitratus est quod belli quasi frigidi tempore has ciuitates foederatas cum aliis ciuitatibus societates facere oportebat sed post bellum frigidum finitum has ciuitates foederatas rebus alienis se non immiscere oportet hic disseritur.

Marcus Regnerus

 

in Principiis hic historiam suam narrat et de indagatione disserit.

duo scriptores de libris nouis colloquuntur

Matthaeus Laurentiades de libro suo hic disserit. etiam de feminarum libertate et quomodo uiri feminaeque eos quibus concumbant eligant sententias exponit.

Monica Molinaria de libro suo hic disserit et sententias exponit: quod multa de natura humana ex primis tribus partibus libri Genesis disci possunt, quod pleraeque horum temporum sententiae erroneae gnosticismi species sunt, quod ius naturale latius docendum est.

philosophia et uectigalia

exponit hic Carina Bentonia nonnullas res uel theses memoratu dignas: quomodo multi thaleri per politiam foederalem consumpti sint; quod ex philosophia Germanica orta est sententia quod homo indiuiduus politiae debitor est; quod ex ea sententia euenit ut in his ciuitatibus foederatis et uectigal reditui impositum sit et politia foederalis maiorque facta sit maioremque pecuniam consumpserit.

de sancto Thoma Aquinate sententiae

 

ex iis quae hic memorantur ego quippe qui praeceptor sum praesertim hoc magni facio: "philosophiae rationalis ac theologiae studia et alumnorum in his disciplinis institutionem professores omnino pertractent ad angelici doctoris rationem doctrinam et principia eaque sancte teneant" (promulgatus anno 1917 codex iuris canonici 1366.2). etiam in huius libri pagina 339 referuntur de Thoma pontificum summorum sententiae: "ipse [Thomas] plus illuminauit ecclesiam quam omnes alii doctores in cuius libris plus proficit homo uno anno quam in aliorum doctrina toto tempore uitae suae" (Ioannes papa XXII); "quoniam omnipotentis Dei prouidentia factum est ut angelici doctoris ui et ueritate doctrinae ex eo tempore quo caelitibus ciuibus adscriptus fuit multae quae deinceps exortae sunt haereses confusae et conuictae dissiparentur quod et antea saepe et liquido nuper in sacris concilii Tridentini decretis apparuit eiusdem memoriam cuius meritis orbis terrarum a pestiferis quotidie erroribus liberatur maiore etiam quam antea grati et pii animi affectu colendam statuimus" (Pius papa V).

inscriptiones Latinae

 

Ioannes Zulsdorfus sacerdos hic et hic et hic et hic memorat.

Ioanna Rolanda iterum efficit

disserit Ioanna Rolanda quod praeter sexum ipsum non est genus sexuale neque ullum in rebus inueniri potest generis sexualis signum sed generis sexualis sententia ex fidei supernaturalis uel scientiae materialis imitatione falsa tenetur. 

narratio utilis

quaedam quae de sancta Missa Tridentina nuper dicta factaque sunt hic utiliter memorantur.

quomodo papae in liturgia orientali memorentur

 

quid de Leone papa I et Clemente papa I et Gregorio papa I in liturgia orientali dicatur hic disseritur.

quanta pecunia in ciuitate Connecticutensi in aduenas illegitimos consumpta sit

 

refertur hic quod in ciuitate mea in eos qui in has ciuitates foederatas contra legem uenerunt consumpti sunt 1.3x10^9 thaleri.

sancti Pii papae X epistola manu scripta

 

de ea hic cum expositione eorum quae cantibus Gregorianis excerpta Pius papa X Latine scripsit: "Christi rubescens sanguine aculeos mutat rosis palmamque uincens fructibus spina est triumphis aptior. Christi dolorum conscia salue corona gloriae gemmis et auro pulchrior uinceris coronas siderum."

loquendi et cogitandi libertas in Europa

de Germania hic et hic. de Scotia hic et hic. de Anglia hic. ergo I.D. Vantius sic locutus est.

sancti Thomae Aquinatis facies?

 

de ea hic et quomodo is mortuus sit.

duces ecclesiastici et globalismus

 

quid Stephanus Fontanus professor existimet Eduardus Pentinus hic refert.

quid femina cupiat

 

Dua Lipa ut hic audiri potest canit: "indigeo aliquo qui me arte ac quam umquam noueram altius teneat et cuius amor me certaminis equestris sensu afficiat et qui prorsus regimen assumere sciat"

artium liberalium studium

 

ad multa opera quibus quomodo artium liberalium studium prosit tractatur hic est nexus.

etiam hoc.

immigratio

 
de immigratione et de eo quod in his ciuitatibus foederatis pauci clerici Latine legere possunt Ioannes Zulsdorfus hic dicit.

de immigratione episcopi Iosephus Striculandus hic et Michael Burbagus hic.

leges quibus infantem in utero interficere non licet

Ingirida Scopa medicinae doctrix hic exponit quomodo quae leges in his ciuitatibus foederatis iussae sunt ut infantem in utero interficere non liceat eae leges operationibus ad conseruandam matris uitam necessariis non obstent.

Susanna Bana philosophiae et medicinae doctrix hic exponit quomodo talibus legibus mortes duarum quarundam feminarum praegnantium imputari non possint.

prominatio in Polonia

 

cinematium hic est.

eorum quae Donaldus Trumpus iam motu proprio iussit

 

index hic est. inter ea Donaldus in politia foederali transgenerismum abolet. quod autem pertinet, Ioanna Rolanda ut hic refertur intellegit quod progressiuistae transgenerismo fauentes errorem politicum fecerunt.

sententiae hac aetate memoria dignae

"non induetur mulier ueste uirili nec uir utetur ueste feminea; abominabilis enim apud Dominum Deum tuum est omnis qui facit haec" (Deuteronomii 22.5)

"itaque flagitia quae sunt contra naturam ubique ac semper detestanda atque punienda sunt, qualia Sodomitarum fuerunt. quae si omnes gentes facerent eodem criminis reatu diuina lege tenerentur quae non sic fecit homines ut se illo uterentur modo. uiolatur quippe ipsa societas quae cum Deo nobis esse debet cum eadem natura cuius ille auctor est libidinis peruersitate polluitur." (sanctus Augustinus in Confessionibus 3.8)

ubi familia sancta fuerit

exempli gratia hic tractatur in quibus locis familia sancta manserit et quando eos in iis locis fuisse necesse sit dato quod Iesus quadraginta dies natus in templo Hierosolymitano ostensus est et inde familia sancta Nazaretham rediit.

Maximus Badius et Aemilia Regina de femina quae uoluntatem suam non dicit

Maximus Badius quem Iesu nomen uitiose adhibere sed in ceteris rem acu tangere existimo in hoc cinematio ad feminam sic respondet.

FEMINA: nuper cum uiro conuentus agebam

MAXIMVS: et?

FEMINA: et uir benignus uir bonus me bene tractabat

MAXIMVS: istud bonum est.

FEMINA: sed

MAXIMVS: male est sed. est sed. cur semper est sed?

FEMINA: sed simul ac cognoui eum maritum meum non esse, propterea quod nunc energiam maritalem solam quaero, eius rem finiui

MAXIMVS: ....his diebus non iam satis est uirum bonum et benignum esse sed necesse est battuarium Duracellum quoque esse et energiam ferre.

FEMINA: tamen igitur ad eum litteras mittens ei dixi me non rem ullatenus processuram uidere.

MAXIMVS: domina, esuris. tibi autem Dominus gallinam bonam beneque coctam apposuit sed eam decreuisti propter eius energiam non manducare. ergo fame morieris.

FEMINA: is autem consentiens dixit se non putare se me laetam facere posse. dum autem id magni habeo, quod ualde benigne responsum est, tamen ne conatus quidem est.

MAXIMVS: propter quid? tu nolebas eum ea quae uolebas respicere an quid?

FEMINA: ne conatus quidem est. dicere ne conatus quidem est se quasi mutari uelle uel se quasi quicquid uelle. tamen ego adduci possum ut uoluntatem alienam faciam. tibi obtemperabo sed tu ne conatus quidem es.

MAXIMVS: ....ea uolebat uirum se adducere ut ipsa eius uoluntatem faceret. hi quales torti ludi mentales sunt? ea putat quod cum uiro conuentus agere est Statio Lusoria quinta. domina, si ludos agere uis i et caramelothlipsin importa. et hunc uirum bonum dimitte.

ad eandam autem feminam Aemilia Regina hic respondet: "uiri boni his ludis qui ad necessitudines pertinent et sectando ei quod apprehendi nolit nullatenus student. iam se ne rogant quidem conerisne ludum agere sed simpliciter arbitrantur te ea quae dicis dicere uelle. et ille auditur energiam uxoralem cupiuisse non puellae quasi uexillum rubrum praeferentis et dicentis 'uisne ludos agere?' et se non tam grauiter gerentis energiam."

Ioanna Rolanda iterum uerborum faces admouet

 

"nulli sunt paruuli transgeneri. nullus paruulus 'in corpore incommodo natus' est. sunt solummodo homines adulti tibi similes puporum salutem corporalem posthabere parati ut in ideologiam ex qua eueniet ut maior quam ex lobotomiis et memoriae falsae syndromo commixtis noxa fiat fidem uestram confirmetis." 

 

filioque

Michael Folius philosophiae doctor hic argumentatur quod symbolum Latinum "filioque" habens et symbolum Graecum non habens cum eorum sententiarum uerba et syntaxis considerantur inter se contraria non esse uidentur. etiam memoratur hic tractatus Marci Bonicordis.

quando Iesus Christus natus sit

 

disseritur hic quo anno Iesus Christus natus sit praesertim quod ex astronomia Herodes rex anno Domini 2 uel 3 mortuus esse sciri potest et ex Iudaeorum more uerisimile est quod Iesus Christus hieme natus est.

sancti Ioannis Didaci miraculum

Ioannes Zulsdorfus sacerdos hic de sancti Ioannis Didaci miraculo disserit. etiam ut solet nos monet: "si in miracula non credimus ea non petimus. ea autem nisi petiuerimus non dabuntur."

Michaelis Paunii sententiae

 

referuntur hic multa quae Michael Paunius professor Helsingiensis de consiliis eorum qui Fori Oeconomici Oecumenici participes sunt et hominum similium dixit praesertim quod ii populi salutem non in animo habent.

de uiris qui se feminas putant

de uiris qui se feminas putantes in feminarum ludis athleticis contendere uolunt Ioanna Rolanda rem acu tangit, ut hic refertur.

duae res mensis Nouembris die nono factae

mensis Nouembris die nono anno quidem 324 basilica Laterana dedicata est (hic et hic) anno autem 1989 homines per murum Berolinensem transire sini coeperunt (hic).

Maximus Badius et Aemilia Regina de femina quae ludos mente agit

Maximus Badius quem Iesu nomen uitiose adhibere sed in ceteris rem acu tangere existimo in hoc cinematio ad feminam sic respondet.

FEMINA: fateor me problema esse.

MAXIMVS: quid? puella fatetur? finiturne mundus?

FEMINA: conuentum cum hoc uiro egi et is dicebat "hora sera fit. uisne ad locum meum recedere?"

MAXIMVS: conatane es eocum in eius loco coire, sed is recusauit?

FEMINA: et ego dicebam "recedam sed tibi non concumbam."

MAXIMVS: hem. istud problema non est. si crustulum dare non uis, non das. quomodo tu problema es?

FEMINA: "quale non fit." et dicebat "istud totum placet. simpliciter ad locum meum ueni" et dicebam "placet."

MAXIMVS: duo homines adulti quibus est pactio internationalis qua decreta obligentur. hic nihil problematis uideo. domina, hoc taediosum fit. quid est problema?

FEMINA: ergo ad eius locum eo. is ea quae uolo respicit, tam benignus est, me totam noctem fouet, et puto, "quidnam?"

MAXIMVS: en mama mea! problema ueniens uidere nunc possum.

FEMINA: "esne cruciabunde homosexualis? quidnam?"

MAXIMVS: domina, esne delirula? quomodo ex eo quod ea quae uolebas respexit subito sequitur ut ei mentula placeat?

FEMINA: et quasi ego...is...simpliciter eum aliquo modo conari uolebam ita ut negarem. scin quid dicam?

MAXIMVS: ....domina, si ludos agere uis, i et caramelothlipsin importa.

FEMINA: ei non concumbitura eram sed simpliciter ego nunc tali sensu afficior quasi deformis sum.

MAXIMVS: istud est problema tuum. sed ah gaudeo quod scis te problema esse. nunc i et te solue.

de eadem autem femina Aemilia Regina hic monet: "hoc feminae genus uiris ualde cauendum est."

epistola de sancta Missa et lingua Latina

in hac epistola Ericus Cunelt-Leddinensis argumentatur in sancta Missa linguam Latinam unitatem efficere et nationalismum superare. etiam dicit quando lingua Latina in sancta Missa in linguae Graecae loco adhiberi inciperet linguam uulgarem in linguae ad eruditionem pertinentis locum assumptam esse. ad eam sententiam admiror quid sit quod Christina Mormanna et alii respondeant.

ecclesia cathedralis sancti Bauonis

 
de ea Gregorius Pippius hic disserit.

insulae Athenienses

 

de iis hic disseritur.

barba

quis sciebat omnia ea quae barba significaret? Iosephus Nauarranus hic: "ex indagatione factum est indicium quod ii qui suffragium ferunt (haud mirum) barbas uiriliores esse uident. ea res ab aliis ab quibus ibi uires et facultas uidentur bona existimari potest sed ab aliis ac praesertim feminis mala existimari potest quippe quae et impetuum ultro faciendorum et normis feministicis aduersandi morem significet." mihi autem quippe qui barbam iamdudum gero propterea quod eam decoram arbitratus sum nunc plures sunt eius gerendae causae!

Ioannis Kerriensis sententiae

 

quid Ioannes Kerriensis dixerit et quid alii responderint hic refertur.

sanctae Missae Tridentinae dictae lectiones

 

Petrus Quasneuius philosophiae doctor hic disserit quomodo eius sanctae Missae lectiones prosint.

quid indulgentia absolutio remissio significet et alia ex Ioanne Zulsdorfo

 

de indulgentia absolutione remissione hic: pertinet indulgentia quidem ad misericordiam absolutio autem ad peccatum dimissum remissio autem ad poenam dimissam.

de lingua Latina et ecclesia hic et hic.

hic de hac Demosthenis sententia: "[Aeschines] illi fauens digna multis, o Iuppiter et omnes dei, mortibus uerba loquebatur quod uos nec maiorum meminisse oporteat" (19.15-16)

situs utilis

de climate. 

nuper relata

de societatibus technologicis hic.

de eo qui Noui Eboraci sanitati praefectus erat hic.

de uicepraeside contra loquendi libertatem agenti hic.

Robertus Duyer archiepiscopus Portlandensis de liturgia

 

quid is de liturgia arbitratus sit hic et hic refertur.

eae litterae quae "quo primum" appellantur

 

de iis litteris et aliis rebus hic in eo blogo qui "Rorate caeli" dicitur Claudius Bartaeus sacerdos disserit.

Sinae communisticae

 

res memoratu dignae hic et hic narrantur.

ex atheisto

hic memorantur quaedam Ricardi Dauidulii atheistae sententiae.

Georgius Bergolius et theologia Catholica

 

qui blogus "Rorate caeli" dicitur in eo blogo in hoc tractatu proponit Vigilius hanc thesin quod Georgii Bergolii actiones uerbaque optime intelleguntur si is fraternitatem omnium hominum naturalem uitae supernaturali antehabere putatur.

ad eum tractatum conscripta est responsio in qua proponitur haec thesis quod Georgius Bergolius nihil nisi potestatem auctam cupit.

respondet autem hic Vigilius non solum de Georgio Bergolio sed generaliter de theologia fundamentalia exponens. ut summatim dicam, in theologia Catholica ex Dei incarnatione qua naturae diuinae natura humana coniungitur non dicitur omnis homo Iesu Christo coniungi; cf. sanctus Thomas Aquinas dicit "uerbum [Dei] habet naturam humanam sibi unitam" et "natura humana...unitur uerbo [Dei]" sed etiam hanc sancti Ioannis Damasceni sententiam memorat: "Dei uerbum non assumpsit naturam humanam in uniuersali sed in atomo" quod est in indiuiduo (summa theologiae 3.2.2). ergo homini ut is Iesu Christo coniungatur necesse est coniungi eligere. 

Vigilius hic etiam memorat quod ante talem electionem humanam et liberam est electio diuina, quod pertinet ad illum mysterium, quod homo a Deo praedestinari et libere eligere potest: "electionis gratia diuina libertatem nostram antecedit et, id quod intellegi non potest, libertatis nostrae assensum ita efficere potest ut libertas nostra non deleatur." 

in iis autem litteris quae a concilio Vaticano secundo editae "Gaudium et spes" appellantur dicitur "ipse enim filius Dei incarnatione sua cum omni homine quodam modo se uniuit" (22), quam sententiam Vigilius periculosam et deuiationis effectiuam dicit. nam quid est "quodam modo"? (mihi igitur ea sententia est exemplo eius ambiguitatis quod est illius concilii uitium.) Georgius Bergolius autem putat filium Dei incarnatione sua cum omni homine tali modo se uniuisse ut primum omnes homines siue scientes siue nescientes iam Dei liberos et familiam esse secundum ad adipiscendam salutem aeternam necesse non sit fidem Christianam eligere tertium inter eos qui Christi sunt et alienos nihil distinguatur sed Christo aduersari uideantur soli ii qui inter Christianos et alienos distinguunt ac fidem Christianam eligendam dicunt qui ex ea causa a Georgio Bergolio "retrogressores" dicuntur. porro ut omnes Christo coniuncti existimentur Georgius Bergolius etiam negat de bono et malo iudicia ex principiis generalibus fieri posse ita ut nominalismo fauens dicere possit "quis sum qui iudicem?" scilicet quamquam existimat rationem tam inualidam esse ut ea de rebus particularibus ex regulis generalibus iudicium fieri non possit tamen iudicat retrogressores a bono deficere. sed qua re Georgius Bergolius ad has sententias habendas mouetur?  inuidiam Vigilius putat.

Maximus Badius de femina quae uirum qui non actu est cupit

 

Maximus Badius quem Iesu nomen uitiose adhibere sed in ceteris rem acu tangere existimo in hoc cinematio ad feminam sic respondet.

FEMINA: hac aestate nihil cupio nisi uirum qui munus habet...

MAXIMVS: locus non idoneus. experire agricolas solos.

FEMINA: ...corpus exercet, cibi amator est...

MAXIMVS: locus non idoneus. experire domum D. I. Kaledis. [quis is sit nescio.]

FEMINA: ...sed etiam delectari amat, modum uiuendi nihil nimis habentem agit...

MAXIMVS: o domina, tibi hic auxilium dare conor, sed istud incipit multum sonare.

FEMINA: ita corpus exercet et munere fungitur et molit sed etiam bidua finalia agere amat...

MAXIMVS: istud duos et inter se alios homines sonat: Saxum et Chriseanam Saxam.

FEMINA: et conuiuari amat, peregrinari amat...

MAXIMVS: o domina mea, esne delirula? operatio molitio conuiuatio peregrinatio talibus hominibus quales homines esse solent non inter se iunguntur.

FEMINA: talis est qualis die Iouis domi maneat et iubeamus cibum inferri...

MAXIMVS: die Iouis? quo igitur die operatur et molit? die...[Saturni]? 

FEMINA: et simpliciter otium agamus, Netflicem spectemus, nihil quicquam faciamus...

MAXIMVS: dicis "otium agamus" et "nihil faciamus" sed ista quo modo loqueris eo modo rem defatigatiuam sonant.

FEMINA: ...die Martis ad me sine regula textum mittit et dicit "uestes muta et ante horam octauam te paratam habe propterea quod conuentum nobis excogitaui..."

MAXIMVS: eius diem Martis et diem Iouis et biduum finale cupis sed uis eum molere et operari....delirulum in hac nimis ualidum est.

FEMINA: ubi is uir est?

MAXIMVS: in imaginatione tua!

FEMINA: nam propter haec in hanc aestatem uirum iamdudum quaero neque eos inuenire possum.

MAXIMVS: scilicet.

FEMINA: et Noui Eboraci multi sunt uiri--noli negare--neque eum inuenire possum.

MAXIMVS: o domina mea, eum si caput tuum aperueris in eo istic inuenies.

FEMINA: sed etiam uolo ut is me omnibus diebus intuens putet quod me nanctus brauium in sortium ludo accepit.

MAXIMVS: si ea quae puto dixero comprehendar. abeo.

ego autem admiror utrum femina grauiter loquatur an iocetur uel trollet. etiam noto quod femina uirum "in aestatem" cupit. ergo puto quod ea non consortium uerum perpetuumque sed simpliciter aliquid delectationis cupit.

Rebeccae Barrettae historia et Aemiliae "Americam saluam facientis" sententiae

 

Rebecca hic refert: "ego anno 2017: me sustentans 'magistrella' quae nec uiro indigebam nec uirum cupiebam sed 'sedem ad mensam' cupiebam. ego anno 2023: gaudiose nupta quae mater domi maneo et e domo reditum quasi passiuum facio, et ea mensa ad quam solam sedeo est cenatoria."

Aemilia quae se Americam saluam facere dicit hic huic thesi assentitur quod iure suffragii feminis dato orta sunt mala.   

sanctam Missam participare

est hic epistola Euelini Vaui.

sunt hic sententiae Eduardi Casualli sacerdotis.

beneficium officium ministerium

Seneca de beneficiis 3.18.1: "sunt enim qui ita distinguant: quaedam beneficia esse quaedam officia quaedam ministeria. beneficium esse quod alienus det: alienus est qui potuit sine reprehensione cessare. officium esse filii uxoris earum personarum quas necessitudo suscitat et ferre opem iubet. ministerium esse serui quem condicio sua eo loco posuit ut nihil eorum quae praestat imputet superiori."

feminarum sententiae

 

in hoc Aemiliae Reginae cinematio femina quae 2:31-3:22 loquitur: "in hoc puellam uidi dicentem quod quando uirum bonum habes in ista culina eris et tibi placebit, nec plus consentire possum. nam talis eram qualis dicerem 'immo cibum suum parare potest, immo mane hora tertia uel quarta non expergiscar ut prandia non parem. non ita faciam. sed, scis, nunc et--nunc quando uirum bonum habeo nunc quando curor: 'ita, domine. expedite. expedite.' 'oh, auia tua carnem guisatam et tortillas domi factas parabat, et ea tibi maxime placebant? bene. carnem guisatam et tortillas domi factas parare discam. res tam simplex est. discos odi, discos cruciabundos toto animo odi. nunc indiges ut discos lauem? tibi uno melius faciam quae postea trulleum quoque perlauabo.' mirum est quomodo te aliter habeas quando curaris."

in hoc autem alia femina dicit se uiri quippe qui se raedae appropinquanti extraxisset piguisse. ego autem Aemiliae consentio quod spero illam feminam non grauiter loqui.

Pauli papae III litterae quae "sublimis Deus" appellantur

earum litterarum quae a Paulo papa III scriptae "sublimis Deus" appellantur tres textus in interreti (hic et hic et hic) inueni, sed ii uitia habent neque inter se concordes sunt. ergo eas litteras sic recensui: 

 

Paulus episcopus seruus seruorum Dei uniuersis Christi fidelibus praesentes litteras inspecturis salutem et apostolicam benedictionem. sublimis Deus sic dilexit humanum genus ut hominem talem condiderit qui non solum boni sicut ceterae creaturae particeps esset sed ipsum summum inaccessibile et inuisibile bonum attingere et facie ad faciem uidere posset, et cum homo ad uitam et beatitudinem aeternam obeundam etiam sacrarum scripturarum testimonio creatus sit et hanc uitam et beatitudinem aeternam nemo consequi ualeat nisi per fidem domini nostri Iesu Christi fateri necesse est hominem talis conditionis et naturae esse ut fidem Christi recipere possit et quemcumque qui naturam hominis sortitus est ad ipsam fidem recipiendam habilem esse. nec enim quisquam adeo desipere creditur ut sese credat finem obtinere posse et medium summe necessarium nequaquam attingere. hinc ueritas ipsa quae nec falli nec fallere potest cum praedicatores fidei ad officium praedicationis destinaret dixisse dignoscitur "euntes docete omnes gentes." "omnes" dixit absque omni defectu cum omnes fidei disciplinae capaces exsistant. quod uidens et inuidens ipsius humani generis aemulus qui bonis omnibus ut pereant semper aduersatur modum excogitauit hactenus inauditum quo impediret ne uerbum Dei gentibus ut saluae fierent praedicaretur ac quosdam suos satellites commouit qui suam cupiditatem adimplere cupientes occidentales et meridionales Indos et alias gentes quae temporibus istis ad nostram notitiam peruenerunt sub praetextu quod fidei Catholicae expertes exsistant uti bruta animalia ad nostra obsequia redigendos esse passim asserere praesumunt et eos in seruitutem redigunt tantis afflictionibus illos urgentes quantis uix bruta animalia illis seruientia urgeant. nos igitur qui eiusdem domini nostri uices licet indigni gerimus in terris et oues gregis sui nobis commissas quae extra eius ouile sunt ad ipsum ouile toto nisu exquirimus attendentes Indos ipsos utpote ueros homines non solum Christianae fidei capaces exsistere sed ut nobis innotuit ad fidem ipsam promptissime currere ac uolentes super his congruis remediis prouidere praedictos Indos et omnes alias gentes ad notitiam Christianorum in posterum deuenturas licet extra fidem

exsistant sua tamen libertate ac rerum suarum dominio priuatos seu priuandos non esse immo libertate et dominio huiusmodi uti et potiri et gaudere libere et licite posse nec in seruitutem redigi debere ac quicquid secus fieri contigerit irritum et inane nulliusque roboris uel momenti ipsosque Indos et alias gentes uerbi Dei praedicatione et exemplo bonae uitae ad dictam fidem Christi inuitandos fore et praesentium litterarum transumptis manu alicuius notarii publici subscriptis ac sigillo alicuius personae in dignitate ecclesiastica constitutae munitis eandem fidem adhibendam esse quae originalibus adhiberetur auctoritate apostolica per praesentes litteras decernimus et declaramus, non obstantibus praemissis ceterisque contrariis quibuscumque. datum Romae anno domini millesimo quingentesimo trigesimo septimo, quarto nonas Iunii pontificatus nostri anno tertio.