codices qui in interreti sunt

codices qui in Heluetia seruantur hic uideri possunt.

melior laudandorum paruulorum modus

hic exponitur thesis quod paruuli non propter eorum ingenium moresue sed propter ea quae fecerunt laudandi sunt.

Georgii cardinalis Pelli de conubio et sacra communione sententiae

ut hic refertur, Georgius cardinalis Pellus sic scripsit:

quid de Henrico rege VIII?

quod animum tenet, illam doctrinam duram "quod ergo Deus coniunxit homo non separet" (Matthaeus 19.6) Iesus non multo postea dedit quam Petro instanter affirmauit ueniam dare oportere (uide Matthaeum 18.21-35).

illud uerum est quod Iesus cui moechae mors lapidatione intentabatur eam moecham non condemnauit sed eam iussit neque in eius opera bona perseuerare nec sine mutatione in eius modo uiuendi permanere sed non amplius peccare (uide Ioannem 8.1-11).

iis qui nouam sumendae sacrae communionis disciplinam doctrinalemque pastoralemque suadent insuperabiliter obstat hoc quod de hac re paene omnes Catholici duo milia annorum idem iamdudum existimant. illud uerum est quod Christianis orthodoxis orientalibus est uetus sed alius mos qui iis primum ab eorum imperatoribus Byzantinis impositus est sed Catholicis numquam in usu erat.

fortasse asseuerari potest saeculis priscis ante concilium Nicaenum disciplinas poenitentiales nimis truces fuisse quippe quando in controuersia erat possentne homicidae et moechi et apostatae consociationibus sui quisque loci per ecclesiam reconciliari tantummodo semel--an numquam. tamen ii Catholici prisci semper fatebantur Deum ueniam dare posse etiam quando ecclesia peccatoribus in consociationem reditum concedere non adplene posset.

tam dura regula tunc erat quando ecclesia quamquam persecutionem patiebatur tamen numero crescebat. ea regula negligi non plus potest quam concilii Tridentini uel Sancti Ioannis Pauli papae II uel Benedicti papae XVI de conubio doctrinae. erantne ea quae post Henrici regis VIII diuortium decreta sunt tota uana?

caffeum

in hoc tractatu refertur quod caffei pocula a tribus ad quinque numero quoque die sumpta corpori nullo modo nocere sed fortasse prodesse uidentur.

de eo quod est pontifici Romano iuste resistere nonnullae sententiae

Ioannes cardinalis Turrecrematensis quam summam de ecclesia scripsit in ea summa dicit "ubi ergo papa iuberet aliquid contrarium sacrae scripturae siue articulis fidei aut ueritati sanctorum aut mandatis iuris naturalis siue diuini ei oboediendum non esset sed talia praecipiens despiciendus est" (2.49).

Sanctus Robertus cardinalis Bellarminus quod opus de Romano pontifice scripsit in eo opere dicit "sicut licet resistere pontifici inuadenti corpus ita licet resistere inuadenti animas uel turbanti rem publicam et multo magis si ecclesiam destruere niteretur; licet, inquam, ei resistere non faciendo quod iubet et impediendo ne exsequatur uoluntatem suam" (2.29).

Franciscus Suarius quod opus de triplici uirtute theologica scripsit in eo opere dicit "si enim [pontifex Romanus] aliquid statuat contra bonos mores non erit illi parendum" (10.6.16).

tunicae inconsutilis imago

ut hic refertur, Gerhardus cardinalis Molinarius dixit "nouimus nos omnes tunicae inconsutilis imaginem quae adhibetur ut hoc manifestum sit quod doctrinae moralis Catholicae partes neque inter se contrariae nec separabiles sunt ita ut rerum moralium et diuinarum et politicarum lineae in unito uisu morali uniantur. ea tunicae inconsutilis imago Iosepho cardinali Bernardino ascripta ualde efficaciter adhibita est ut ea quae ecclesia ad uarias res morales ab armorum nuclearium multiplicatione diffusioneque ad inopiam respondeat in illa quadam doctrina quae multa complectitur quod uita humana ab conceptione naturali ad mortem naturalem sacra est radices habeant. id quod dolendum est, autem hoc quoque uerum est quod tunicae inconsutilis imaginem nonnulli theologi et qui Catholici res publicas gerunt adhibuerunt quodam modo quo alios in errorem intellectualem inducerent ut interdum infantis abortum contraconceptionemue pecuniaeue publicae ad cellulas staminales embryonicas indagandas usum sinant aut saltem argumententur iis rebus non obsistere iustum esse dummodo una cum iis rebus contra supplicium ultimum aduersatio agatur uel hominum inopum progressio oeconomica promoueatur, quae res quoque doctrinae moralis Catholicae textilis partes sunt."

ad eas sententias respondeo quod ex iis quae ii qui tunicae inconsutilis imagine perperam utuntur promouent quaedam exempli gratia pacifismus et ultimi supplicii improbatio re uera ad doctrinae moralis Catholicae textile non pertinent. nam doctrina moralis Catholica nec bellum nec ultimum supplicium uetat sed explicat quid inter eorum usum iustum et usum iniustum intersit. 

nam de bello Sanctus Augustinus contra Faustum Manichaeum in libro uicesimo secundo dicit "quid enim culpatur in bello? an quia moriuntur quandoque morituri ut domentur in pace uicturi? hoc reprehendere timidorum est non religiosorum. nocendi cupiditas ulciscendi crudelitas impacatus atque implacabilis animus feritas rebellandi libido dominandi et si qua similia haec sunt quae in bellis iure culpantur; quae plerumque ut etiam iure puniantur adversus uiolentiam resistentium siue Deo siue aliquo legitimo imperio iubente gerenda ipsa bella suscipiuntur a bonis cum in eo rerum humanarum ordine inueniuntur ubi eos uel iubere tale aliquid uel in talibus oboedire iuste ordo ipse constringit" (22.74).

et de ultimo supplicio Sanctus Thomas Aquinas in summa theologiae dicit "si aliquis homo sit periculosus communitati et corruptiuus ipsius propter aliquod peccatum laudabiliter et salubriter occiditur ut bonum commune conseruetur" (IIaIIae.64.2).      

Raimundi Leonis cardinalis Burci sententiae

Raimundus Leo cardinalis Burcus in hoc colloquio dicit ex iis quae feminizata circumiaceant et eo quod duces ecclesiastici uirorum animos excitare non conati sint multos uiros adductos esse ut simpliciter ab ecclesia abesse eligant.

in hoc colloquio idem confirmat ea quae de matrimonii indissolubilitate et qui actus uenerei extra matrimonium uel inter eiusdem sexus homines aguntur eorum actuum sceleritate graui ab ecclesia docentur mutari non posse.

alius praeceptor computatra portabilia in lectione adhiberi uetat

Tal Grossus, ut in hoc tractatu narrat, computatra portabilia in lectione adhiberi uetat, inter alias causas, quia ea cum in lectione adhibentur non solum usoribus suis sed etiam iis qui prope sedent animum distrahunt et quia in quadam indagatione (ea et plura hic et hic et hic) euenit ut ii qui penna chartaque notas scripserant quam ii qui computatro notas fecerant multo prosperius ad quaestiones conceptuales responderent.

differentia et diuersitas

Sanctus Thomas Aquinas sic explicat "quid inter differentiam et diuersitatem intersit. differens enim, ut in X Metaph. determinatur, dicitur ad aliquid; nam omne differens aliquo est differens. diuersum autem aliquid absolute dicitur ex hoc quod non est idem. differentia igitur in his quaerenda est quae in aliquo conueniunt; oportet enim aliquid in eis assignari secundum quod differant sicut duae species conueniunt in genere unde oportet quod differentiis distinguantur. in his autem quae in nullo conueniunt non est quaerendum quo differant sed seipsis diuersa sunt. sic enim et oppositae differentiae ab inuicem distinguuntur. non enim participant genus quasi partem suae essentiae et ideo non est quaerendum quibus differant; seipsis enim diuersa sunt. sic etiam Deus et materia prima distinguuntur quorum unus est actus purus aliud potentia pura in nullo conuenientiam habentes." (Summa contra gentiles 1.17.7)

ex charta legere et electronice legere

in hoc tractatu dicitur quod ex charta legere quam electronice legere ad meliorem memoriam fert et quod qui legendi modus ad membranas uitreas adhibetur eo legendi modo fit ut minus intelligatur et ad longius uerborum scriptorum corpus legendum animum intendere difficilius fit.

cur praeceptor uetuerit quaedam instrumenta moderna in lectione adhiberi

hic refertur tractatus in quo Claius Sircius (Anglice: Clay Shirky) praeceptor explicat cur uetuerit discipulos computatris et tabellis et telephonis in lectione uti. inter alia is notat haec quod homini plura quam unum opera simul facere conanti operationes intellectuales impediuntur et quod in lectione cum alius discipulus computatro et ceteris utitur alii discipuli afficiuntur.

quomodo nos oporteat mathematicen docere--et, quod addo, linguam Latinam

hodie in Viae Muralis Rebus Diurnalibus est tractatus hoc nomine "quomodo nos oporteat mathematicen docere" in quo dicuntur quaedam quae mihi etiam ad docendam linguam Latinam pertinere uidentur praesertim quod peritia uera partim ex exercitio oritur et quod praeceptores ingeniosi faciunt ut qualis repetitio subtiliter mutatur extenditurque per talem repetitionem materia noua mixtam discipulus uoluntate et iudicio se exerceat et usque ad discendi gradum summum perueniat.    

contra Caroli Rahneri thesin

in hoc tractatu bene explicatur haec Caroli Rahneri thesis quod fides Christiana ut qui populi mores neque ab Iudaeis neque a Graecis neque a Romanis ducunt ab iis populis acceptetur ad substantiam finalem et fundamentalem redigenda est ut iis populis singulis idonea fiat, et contra eam thesin Benedictus papa XVI refertur argumentatus esse quod de fide Christiana neque elementa Iudaica nec Graeca nec Romana demi possunt.

alius praeterquam

"cum aliud praeterquam de quo rettulissent decemuiri dicere prohiberent Claudium interpellandi uerecundia fuit" (Liuius 3.40)

"si aliorum praeterquam ipsius ratio haberetur comitiis se moram non facere" (Liuius 27.6)

id quod est super significans id quod "in addition to" Anglice dicitur

"...Achaei quoque quos super Aetolicum bellum Machanidas etiam Lacedaemonius tyrannus haud procul Argiuorum fine positis castris terrebat" (Liuius 28.5).

ea quae sunt praeter et praeterquam significantia id quod "in addition to" uel "besides" Anglice dicitur sine uerbo negatiuo

praeter

in quo tractatu Desiderius Erasmus (philosophus malus sed Latinista bonus) de hoc adagio "dulce bellum inexpertis" disserit in eo tractatu dicit "[Deus] elephantos praeter cutem et molem promuscide quoque tutatus est".

"oportet igitur, praeter id quod mouet ad proprium bonum uniuscuiusque, esse aliquid quod mouet ad bonum commune multorum." (sanctus Thomas Aquinas De regno 1.1)

"potest ergo hoc nomen corpus significare rem quandam quae habet talem formam ex qua sequitur in ipsa designibilitas trium dimensionum cum praecisione ut scilicet ex illa forma nulla ulterior perfectio sequatur sed si quid aliud superadditur sit praeter significationem corporis sic dicti. et hoc modo corpus erit integralis et materialis pars animalis quia sic anima erit praeter id quod significatum est nomine corporis et erit superueniens ipsi corpori ita quod ex ipsis duobus scilicet anima et corpore sicut ex partibus constituetur animal" (sanctus Thomas Aquinas De ente et essentia)

"praeter egregie suppletas duas ueteres legiones transfugarum etiam Numidarum equitum peditumque magnam uim haberet" (Liuius 27.8)

"praeter eam causam etiam uelut fortuita inclinatio animorum quae Hispaniam omnem auerterat ad Romanum a Punico imperio traxit eum" (Liuius 27.17)

"Umbriae populi et praeter hos Nursini et Reatini et Amiternini Sabinusque omnis ager milites polliciti" (Liuius 28.45)

praeterquam quod

"in exercitu suo se praeterquam quod omnis ciues aut socios Latinique nominis uideat etiam eo moueri quod nemo fere sit miles qui non aut a patruo suo Cn. Scipione qui primus Romani nominis in eam prouinciam uenerit aut a patre consule aut a se sit ex Italia aduectus" (Liuius 28.32)

"ceperat iam ante Numidam ex fama rerum gestarum admiratio uiri substitueratque animo speciem quoque corporis amplam ac magnificam; ceterum maior praesentis ueneratio cepit et praeterquam quod suapte natura multa maiestas inerat adornabat promissa caesaries habitusque corporis non cultus munditiis sed uirilis uere ac militaris et aetas in medio uirium robore quod plenius nitidiusque ex morbo uelut renouatus flos iuuentae faciebat" (Liuius 28.35)

religio in Anglia mutata

in hoc tractatu disseritur quales Angli ante Henrici regis VIII diuortium in religione fuerint et quae mala Henricus et socii fecerint. ex illo tractatu noto praecipue has theses primum quod anno 1533 Catholicismus et a plurimis Anglis colebatur et in plurimis Angliae partibus florebat secundum quod Catholicismi reiecti auctores erant non populi Anglici pars maior sed Henricus et socii. 

nonnulli Russi qui in pontificis Romani communione erant

hic disseritur de Vladimiro Soloviev et Nicolao Tolstoy et beato Leonida Feodorov qui Russi in pontificis summi communione erant.

apud Liuium mirabilis Marcelli oratio

"deis immortalibus ut in tali re laudes gratesque ago quod uictor hostis cum tanto pauore incidentibus uobis in uallum portasque non ipsa castra est aggressus. deseruissetis profecto eodem terrore castra quo omisistis pugnam. qui pauor hic, qui terror, quae repente qui et cum quibus pugnaretis obliuio animos cepit? nempe iidem sunt hi hostes quos uincendo et uictos sequendo priorem aestatem absumpsistis quibus dies noctesque fugientibus per hos dies institistis quos leuibus proeliis fatigastis quos hesterno die nec iter facere nec castra ponere passi estis. omitto ea quibus gloriari potestis cuius et ipsius pudere ac paenitere uos oportet referam. nempe aequis manibus hesterna die diremistis pugnam. quid haec nox, quid haec dies attulit? uestrae his copiae imminutae sunt an illorum auctae? non equidem mihi cum exercitu meo loqui uideor nec cum Romanis militibus. corpora tantum atque arma eadem sunt. an si eosdem animos habuissetis terga uestra uidisset hostis? signa alicui manipulo aut cohorti abstulisset? adhuc caesis Romanis legionibus gloriabatur. uos illi hodierno die primum fugati exercitus dedistis decus." clamor inde ortus ut ueniam eius diei daret; ubi uellet deinde experiretur militum suorum animos. "ego uero experiar..., milites, et uos crastina die in aciem educam ut uictores potius quam uicti ueniam impetretis quam petitis." (Liuii 27.13)

de quadam Liuii sententia notae

"sensere etiam barbari magnitudinem animi cuius miraculo nominis alii mortales stuperent id ex tam alto fastigio aspernantis." (27.19)

primum eius quod est "cuius" et eius quod est "id" usus correlatiuus; secundum id quod est "cuius" quam id quod est "id" prius est; tertium id quod est "nominis" eocum quod est "cuius" iunctum est.  

Cyri institutionis partes carissimae

1.6.21: "nam homines quem de eo quod ipsis prodest prudentiorem quam se esse existimant ei ualde libenter parent."

2.2.21: "nam [Cyrus] existimabat hos ipsos quoque meliores fore si scirent se quoque ex operibus suis iudicatos digna accepturos esse."

2.2.23-25: "ducere autem, ut opinor, conantur honesti bonique quidem ad honesta bonaque scelesti autem ad scelesta. itaque saepe plures assectatores accipiunt praui quam probi. nam sceleri quippe quod quae uoluptates ilico capi possunt per eas uoluptates procedit cooperantur eae ipsae uoluptates ad multis persuadendum ut sceleris participes sint. uirtus autem quae ad arduum fert in secutione extemporali minime uersuta est praesertim si contra uocant alii ad ruinam et mollitiam. itaque cum aliqui tantummodo socordia et desidia mali sunt hoc dignum existimo quod ii sicut fuci socios nullo damno praeter impendium afficiant. qui autem non solum laborum socii mali sed etiam in capiendam partem ampliorem auidi impudentesque sunt ii etiam ad scelera duces sunt. nam saepe demonstrare possunt scelus partem ampliorem afferre. ergo tales homines nobis ex toto expellendi sunt."

3.1: Tigranes Cyro persuadet ut patri suo parcat.

7.5.73-86: Cyrus disserit sibi ceterisque multa adeptis curandum esse ut boni maneant, et "cum aliquis in iis [uirtutibus] se exercere desiit inde in uitium reuertitur" et studendum esse ut ipsi quam ii quos regant meliores uideantur et quo maior opera alicui rei data sit eo maius gaudium ex ea re accipi et ab paruulis parentes quippe qui se quam optima exempla praebere uelint ad uirtutem stimulari. 

8.1.12: "nam non existimabat fieri posse ut si qualem oporteret talis ipse non esset alios ad nobilia et bona opera incitaret."

8.1.26-33: Cyrus arbitratus est quales homines esse uellet tales socios suos et ministros fore si ipse se talem exhiberet. 

8.2.1: "primum enim per omne tempus semper animae beneuolentiam quam maxime exhibebat quippe qui existimabat quod ut facile est neque eos qui odisse uidentur diligere nec maleuolis beneuolum esse sic etiam fieri non potest ut hi qui diligere et beneuoli esse sciantur ab illis qui se diligi existiment odio habeantur."

in quibus familiis est tantummodo unus parens

in hoc tractatu disseritur quomodo ab uno parente solo educari et in ordine oeconomico inferiore esse uel manere correlatiua sint. exempli gratia multa problemata iis paruulis qui a uiro et femina extra conubium cohabitantibus uel ab uno parente educantur quam iis paruulis qui ab marito et uxore educantur saepius oriuntur. et qui paruuli quidem ab uno parente educantur eorum paruulorum plures quam uiginti partes centesimae in destitutione diu uiuunt, qui paruuli autem a duobus parentibus educantur eorum paruulorum tantummodo duae partes centesimae in destitutione diu uiuunt. et in quibus uicis familiarum multae partes centesimae unum parentem habent in iis uicis per ordines oeconomicos surgere minus uerisimile est. 

bibliographia Anglica:

Susan Mayer "What Money Can't Buy" 1997

Mitch Pearlstein "From Family Collapse to America's Decline" 2011

Charles Murray "Coming Apart" 2012

Raj Chetty et al. "Where is the Land of Opportunity?" 2014

bellum magnum

cur bellum magnum ortum sit nonnullae theses hic exponuntur: Frederici Piscatoris thesis quod Theodisci cupiebant bellum quo imperium suum maius fieret; Margaritae Millanidis thesis quod Gulielmus imperator II et Helmuthus Moltcianus et Theobaldus Bethmann-Holluegensis in Austriacorum et Serborum contentione non minas sed augendi imperii occasiones uidebant; Christophori Clerici thesis quod non solum Theodisci sed etiam Austriaci et Russi et Franci et societatum inualiditas et id quod nulla erant collegia per quae controuersiae sedarentur bellum causauerunt.

episcoporum societates nationales

ad id quod episcoporum societates nationales haud magnam auctoritatem habent attinent hae Gerhardi Molinarii archiepiscopi sententiae quae in hoc tractatu referuntur quod ecclesia Catholica "ecclesiarum nationalium foederatio non est" et quod nec natio nec lingua nec populi mores ecclesiae principium constitutiuum est et quod ad episcopatum attinet "testimonium proprium" et quod episcoporum societates nationales in ecclesia Catholica "purum principium obiectiuum esse non possunt".

quidam parentium et praeceptorum errores

in hoc tractatu notantur hi parentium (et, addo, praeceptorum) errores: primum paruulos pericula subire non sinere, secundum ad eripiendos ex problematibus paruulos inclinatio, tertium sine causa bona laudare, quartum nimia indulgentia, quintum errorum suorum narratione ad docendum non uti, sextum ubi sit intelligentia bona uel ingenium bonum ibi esse maturitatem putare, septimum quae ipsi praedicant ea non facere.

quantum homines efficiant collatio

in hoc tractatu proponitur quod cum quantum homines singuli efficiant mensuratur et in graphemate confertur id graphema non tintinnabuli formam habet sed ex potentiae multiplicatiuae lege distributionem exhibet.

quomodo Baracus Obama praeses contra legem egerit et alia errauerit

ex hoc tractatu praesertim haec noto primum quod Baracus Obama praeses uel eius ministri in iis quae ad eius legem medicinariam attinent saltem quinque contrarias legi res egerunt secundum quod Obama praeside id quod IRS dicitur quales societates Obamae aduersantur tales societates extraordinarie perscrutatum est tertium quod inter anni 2012 mensem Ianuarium et anni 2013 mensem Iunium nouem iustitiae subministerii theses curiae supremae iudices uno animo refutauerunt quartum quod Obama ministros contra constitutionem praefecit.

quod ad illam legem medicinariam attinet, undecim patroni generales se inscripserunt huic epistolae in qua inter alia dicunt quod quae recentior Obamae regula societatibus assecurantiariis permittit ut contrarias illi legi condiciones offerant ea regula constitutioni contraria est.

in hoc tractatu Ronaldus Ioannides senator Visconsoniensis argumentatur quod Obama et eius ministri in eo quod edixerunt ut Congressus participes et ministri quasdam in Obamae lege medicinaria uetitas res acciperent extra ius suum egressi sunt.

quod inaequalitas nec per se iniusta est neque aboleri potest

 

quod opus de regno partim sancto Thomae Aquinati partim Ptolomaeo Lucensi attribuitur in eius operis parte 1.10 his uerbis dicitur quod dux quam eius ministri maiore praemio dignus est: "in omnibus artibus et potentiis laudabiliores sunt qui alios bene regunt quam qui secundum alienam directionem bene se habent. in speculatiuis enim maius est ueritatem aliis docendo tradere quam quod ab aliis docetur capere posse. in artificiis etiam maius existimatur maiorique conducitur pretio architector qui aedificium disponit quam artifex qui secundum eius dispositionem manualiter operatur. et in rebus bellicis maiorem gloriam de uictoria consequitur prudentia ducis quam militis fortitudo. sic autem se habet rector multitudinis in his quae a singulis secundum uirtutem sunt agenda sicut doctor in disciplinis et architector in aedificiis et dux in bellis. est igitur rex maiori praemio dignus si bene subiectos gubernauerit quam aliquis subditorum si sub rege bene se habuerit". 

 

in eiusdem operis parte 4.9 his uerbis dicitur quod aequalitatem in bonis temporalibus ponere est ordinem in rebus destruere: "et quia opiniones dictorum philosophorum uersabantur circa communitatem possessionum congruum uidetur de aliis dicere qui circa ipsas suam constituerunt politiam. duo enim fuerunt philosophi qui considerantes litigia generari in ciuitatibus ex eo quod unus abundat et alter caret uoluerunt in sua politia adaequare in ciuitatibus suis possessiones. unus fuit Pheleas Chalcedonius de quo philosophus loquitur in secundo Politic. alter fuit Lycurgus Spartanorum regis filius qui Lacedaemoniis iura constituit, ut tradit Iustinus, ut aequata possessio neminem potentiorem altero redderet. modus autem quem teneri uoluit Pheleas in adaequando narratur a philosopho ut fieret uidelicet in ipsa constitutione ciuitatis habita consideratione multitudinis ciuium et camporum: alias difficile iudicabat: et ut hoc perseueraret ordinabat matrimonia contrahi inter maiores et minores: et sic per hoc tollebantur iurgia amouebantur iniuriae auferebantur arrogantiae uel superbiendi materia. ad hoc etiam mouebat exemplum in aliis politiis. quia ubi est bonorum temporalium inaequalitas contingit saepius perturbatio (ibi enim est inuidendi occasio) inde cupiditas oritur quae, iuxta apostolum, radix omnium malorum est. ipse etiam Lycurgus propter hanc causam in legibus quas Lacedaemoniis tradidit pro ipsorum conseruanda politia artificiales subtraxit diuitias siue numismata in commutationibus rerum uenalium in solis naturalibus diuitiis tales permutationes relinquens. sed hanc positionem philosophus reprobat in secundo Politic. ostendens hanc adaequationem omnino impossibilem et per consequens contra rationem. et primo ex parte humanae naturae quae non semper in familiis multiplicatur aequaliter quia contingit unum patremfamilias habere multos filios alium autem nullum. quod ergo isti duo haberent aequales possessiones esset impossibile quia una familia deficeret in uictualibus altera superabundaret et hoc esset contra prouisionem naturae quia quae familia plus multiplicatur in prolem amplius cedit ad firmamentum politiae propter ipsius argumentum quam quae in generatione prolis deficit et quodam iure naturae magis meretur a republica siue politia prouideri. amplius autem natura non deficit in necessariis, ut dictum est supra, ergo nec ars quae ciuilis est regiminis. sed hoc contingit si in familiis adaequantur possessiones quia uidelicet ciues moriuntur penuria unde politia corrumpitur. non tantum autem ex parte naturae humanae sequitur inconueniens adaequare possessiones sed etiam ex gradu personae. est enim differentia inter ciues quemadmodum inter membra corporea cui politia est superius comparata. in diuersis autem membris uirtus diuersificatur et operatio. constat enim quod maiores expensas cogitur facere nobilis quam ignobilis unde et uirtus liberalitatis in principe magnificentia uocatur propter magnos sumptus. hoc autem fieri non posset ubi possessiones essent aequales unde et ipsa uox euangelica testatur de illo patrefamilias siue rege qui peregre profectus est qualiter seruis suis bona distribuit sed non aequaliter; immo uni dedit quinque talenta alteri duo alii uero unum unicuique secundum propriam uirtutem. amplius autem nec ipse ordo naturae hoc patitur in quo diuina prouidentia res creatas in quadam inaequalitate constituit siue quantum ad naturam siue quantum ad meritum. unde ponere aequalitatem in bonis temporalibus ut sunt possessiones est ordinem in rebus destruere quem Augustinus respectu inaequalitatis definit de ciu. Dei [19.13.1]: est enim ordo parium et disparium rerum sua cuique tribuens dispositio. et ex hoc Origenes in periarchon reprehenditur quia omnia dixit aequalia ex sui natura sed facta inaequalia propter defectum sui, hoc est propter peccatum. non ergo ex adaequatione possessionum uitantur litigia quin potius augmentantur dum in hoc destruitur siue tollitur ius naturae quando subtrahitur indigenti qui plus meretur. item quia contra rationem est esse omnia aequalia in politia cum omnia Deus instituerit in numero pondere et mensura, ut in libro Sap. dicitur, quae gradum inaequalitatis ponunt in entibus et per consequens in ciuilibus siue politicis."

 

etiam sanctus Maximilianus Colbius qui libellus nomine Rycerz idest Eques anno 1935 mense Augusto editus est in eo libello dicit "pauper operarius cum hominis diuitis sumptuosum domicilium uel amoenam uillam uidet saepe se rogat 'cur non ego quoque tantas diuitias possideo? cur est in hoc mundo talis inaequalitas?' quot libri de inter homines aequalitate scripti sunt! quantus sanguis pro hac notione fusus est! atqui quamquam omnia haec talia facta sunt tamen nobis etiamnunc sunt diuites et pauperes....tamen animo fingamus quod olim omnes mundi incolae conuenient ut hanc omnium rerum communitatem efficiant et quod re uera dato quod mundus ualde magnus est quisque quae diuitiae super terra sunt earum diuitiarum aequalem sortem accipiet. quid deinde? eodem ipso die uesperi alius fortasse dicet 'hodie strenue operatus sum; nunc autem requiescam'; alius fortasse declarabit 'hanc rerum communitatem ualde bene intelligo. ergo bibamus et modo festiuo agamus tam mirabilis rei gestae memoriam'; alius autem fortasse dicet 'nunc studium ad opus conferam in animo habens ex eo quod accepi quam maximum fructum possum capere'. itaque ex die proximo homo primus quantum accepit tantum habebit; homo secundus autem minus habebit; homo tertius autem res suas auxerit. quid deinde faciamus? incipiamusne diuitias denuo redistribuere? tamen etsi omnes statim simul omnibus suis quisque uiribus operari incipiant non eadem omnibus eueniant. re uera plures quam una sunt operis species quae inaequaliter fructuosae sunt. neque omnes operarii iisdem facultatibus adiuuantur. inde euenit ut ea quae effecta sunt inter se differant et ergo lucrum omnibus idem non sit. quid necesse est imponere ad hoc quod rebus distributis homines in sic accepta aequalitate maneant? ad hoc necesse est ut omnes operarii eadem opera faciant et aequalem intelligentiam facultatesque habeant et ad opus similiter instituti sint et aequaliter sani ualidique sint et praesertim necessariam operam dare aequaliter possint cupiantque. omnia haec autem tota Vtopianica sunt" (Latine ex lingua Anglica huius libri "The Kolbe Reader" [Libertyville, IL: Franciscan Marytown Press, 1987] reddidi; etiam hic).

bibliothecae

hic disseritur de nonnullis bibliothecis ex quibus bibliotheca Malatestiana in partibus occidentalibus uetustissimum spatium habere dicitur. et bibliothecae Scorialensis forma noua fuisse et apud bibliothecarum architectores maxime iamdudum ualere dicitur.

hic disseritur de quindecim bibliothecis e quibus multae in monasteriis et multae in Habsburgensium terris sunt.

alia quae ex Baraci Obamae lege medicinaria eueniunt et euenient

ut hic proponitur, Baraci Obamae lex medicinaria ex consilio constituta est quae assecurantiae medicinariae indiuidualis mercatum deleret. porro, ut exempli gratia hic proponitur, illa lex dici potest ex consilio constituta esse quae deficeret ex cuius defectu necesse esset efficere ut quaecumque cura medicinalis in his ciuitatibus foederatis daretur eius curae pretium politia foederalis solueret.

itaque, ut hic refertur, millionibus Americanorum assecurantiae medicinariae syngraphi propter illam legem iam abrogati sunt uel mox abrogabuntur. porro haec euentura esse sciebant Baraci Obamae ministri etiam abhinc tres annos. ergo cur Baracus Obama dicebat "si assecurantiae medicinariae syngraphus tuus tibi placet eum retinere poteris"?

auri regula et ordo oeconomicus medius

in hoc tractatu inter alia fit mentio quod in his ciuitatibus foederatis postquam auri regula 182 annos in usu fuit ordo oeconomicus medius quam umquam antea diuitior erat.

quae ex Baraci Obamae lege medicinaria euenerint

in hoc tractatu proponitur e Baraci Obamae lege medicinaria euenisse ut munera quidem fractionalia orta sint munera autem plena perierint.

meliores docendi modi

ex hoc tractatu in quo disseritur qui docendi modi sint meliores haec noto: primum quod ad peritiam necesse est utilem criticismum etiam auditu difficilem accipere et 10,000 horas se exercere; secundum quod qui docendi modus metaphora Anglica terebratio dicitur is modus prodest; tertium quod in quadam indagatione quam Maria Poplina profestrix institutionis duxit compertum est efficacissimos praeceptores seueros esse et qui docendi modi traditionales uel explicitiui dicuntur iis modis exempli gratia lectione uti; quartum quod laudari nocere potest.

hylemorphismus et id quae emergentia dicitur

ex hoc tractatu: emergentia dicitur id quod quaedam alicui propria partibus illius alicuius constitutiuis propria non sunt, et emergentia ex hylemorphismo sic explicari potest quod eius quod emergit quasi umbrosa natura causalitatem formalem significat, idest, emergentia pertinet ad hoc quod transitur in quandam causalitatem quae partibus constitutiuis homogenea non iam est.

triades Byzantinae

Aeschyli trias: Persae, Prometheus, Septem contra Thebas

Aristophanis trias: Nubes, Plutus, Ranae

Euripidis trias: Hecuba, Orestes, Phoenissae

Sophoclis trias: Aias, Electra, Oedipus Rex

indices Alexandrini

ut in huius libri pagina 472 traduntur:

septem comoedi antiqui: Aristophanes, Crates, Cratinus, Epicharmus, Eupolis, Pherecrates, Plato

duo comoedi medii: Alexis, Antiphanes

quinque comoedi noui: Apollodorus, Diphilus, Menander, Philemon, Philippides 

decem historici: Anaximenes, Callisthenes, Ephorus, Hellanicus, Herodotus, Philistus, Polybius, Theopompus, Thucydides, Xenophon

decem oratores: Aeschines, Andocides, Antiphon, Demosthenes, Dinarchus, Hyperides, Isaeus, Isocrates, Lycurgus, Lysias

quattuor poetae elegiaci: Callimachus, Callinus, Mimnermus, Philetas

quinque poetae epici: Antimachus, Hesiodus, Homerus, Panyasis, Pisander

tres poetae iambici: Archilochus, Hipponax, Simonides 

nouem poetae lyrici: Alcaeus, Alcman, Anacreon, Bacchylides, Ibycus, Pindarus, Sappho, Simonides, Stesichorus

quinque tragoedi: Aeschylus, Archaeus, Euripides, Ion, Sophocles

Syria

in hoc tractatu disseritur cur in Syria nonnulli Christiani Bassari Alassado faueant.

in hoc tractatu Gregorius III patriarcha Antiochenus refertur dixisse si in Syria Islamistae uicissent Christianos segregatim habitare coactum iri.

Medii Orientis incolae Christiani

hic compendiose tractatur quomodo Medii Orientis incolae Christiani ex imperialismo Turcico et nationalismo et dicto Islamismo affecti sint et etiamnunc afficiantur. in tractatu dicitur quod Christiani quippe qui post imperium Turcicum deletum nationalistis Arabicis fauerunt ab nouioribus Islamistis iamdudum putantur hostes esse.

in Aegypto contra Christianos uiolentia

in hoc tractatu generaliter disseritur de facta in Aegypto contra Christianos uiolentia. in hoc disseritur de oppido nomine Cerdasa ubi inscriptum est ecclesiae parieti hoc "nos uobis furorem exhibebimus et efficiemus ut terrorismum uideatis". et in hoc narratur inscriptum esse ecclesiae ianuis hoc "Aegyptus Islamica est". et hic est index ecclesiarum et aliorum locorum qui ad Christianos attinent in quos impetus facti esse referuntur. et hic notantur ea quae Fraternitatis Mahumetisticae socii et alii dicti Islamistae contra Christianos faciunt.

uocabulorum differentiae

uocabulorum differentiarum index et de uocabulorum differentiis liber

periegetes et philotheorus et uiator uoluptarius uocabula

in Scriptorio Academico Latino optime disseritur quid periegetes et philotheorus uocabula significent et utiliter proponitur hoc uocabulum uiator uoluptarius.

munera

ut hic refertur, mense Iunio relatum est quod tunc ab anni principio in his foederatis ciuitatibus eorum qui munera habebant numerus 753,000 hominibus creuit sed ex his tres fere partes quartae in muneribus fractionalibus erant. similiter, ut hic refertur, ab nouissimae recessionis oeconomicae principio quod anno 2007 inerat ad huius anni mensem Martium eorum qui munera fractionalia habebant numerus 2,800,000 hominibus creuit sed eodem tempore eorum qui munera plena habebant numerus 5,800,000 hominibus decreuit. etiam refertur quod eodem illo tempore eorum qui munera fractionalia propter dictas causas oeconomicas, idest quia uel munera plena adipisci non potuerant uel negotium munere pleno minus erat, habebant numerus 3,400,000 hominibus creuit. ergo uidetur id problema quae munerum uel satis bonorum munerum carentia est nondum solutum esse.

[quod ad uocabula attinet, fractionalis adiectiuum in huius libri nomine Institutionum philosophiae parte mathematica in pagina 76 uideri potest.]

de Ricardo Angliae rege I et Philippo Franciae rege II

hic disseritur de Ricardo Angliae rege I et Philippo Franciae rege II praesertim quid Ricardus in Palaestina Philippus in Francia effecerit. Ricardus quidem memoria dignus est non solum quippe qui multas uictorias contulit sed etiam quippe qui intelligebat quod Hierosolymam Christiani etsi cepissent obtinere non poterant nisi prius potestatem in regione uicina inter mare et urbem firmiter constituissent. Philippus autem memoria dignus est quippe qui potestam regalem suam et capiendis terris et constituenda super nobiles auctoritate auxit.

medicamenta et id quod ADHD Anglice dicitur

hic tractatur quantum--uel quantulum--medicamenta qui paruuli intendendi animi impotentiam nimiamque actiuitatem (idest id quod Anglice ADHD dicitur) habent iis paruulis prosint. uidetur quod medicamenta quamquam intendendi animi potentiam augent tamen non efficiunt ut paruuli in examinibus melius faciant.

eius quod est extra usus exclusiuus

apud Liuium (26.34) uidetur eius quod est extra usus exclusiuus in hac sententia "decreta facta....ipsos liberosque eorum et coniuges uendendas extra filias quae enupsissent priusquam in populi Romani potestatem uenirent" et eius quod est extra quam uel extraquam usus exclusiuus in hac sententia "Campanos omnis Atellanos Calatinos Sabatinos extraquam qui eorum aut ipsi aut parentes eorum apud hostis essent liberos esse iusserunt".

uocabula socius sodalis collega comes

in Crombii Gymnasio hae grammaticorum sententiae collectae sunt:

Frontonis sententia:
"comes iter facit. socius cum altero societatem coiuit et aliquid cum alio communiter possidet aut pari opera et consilio curat. sodalis adolescentiae nomen est."

Laurentii Vallae sententia:
"socii plerumque in rebus seriis et fortunae subiectis; sodales in rebus leuioribus in conuiuiis et lusibus."

Ioannis Friderici Noltenii sententia:
"consortes coniungit amor. socios labor idem.
missio collegas ad eundem copulat actum.
consortes fortuna eadem. socios labor idem.
unum collegas efficit officium.
ast eadem comites unit uia mensa sodales."

de Liuii loco notae

de libri xxvi parte quadragesima notae:

"ratus...non aliud quam tumultum ac secessionem...Numidarum esse" tumultum et secessionem casu accusatiuo

"cum...multitudo maior...uisa" esset uerbo absente

de Plinii loco notae

Plinii epistola 7.9: "qui sint hi adeo notum probatumque est ut demonstratione non egeat et alioqui tam immodice epistulam extendi ut dum tibi quemadmodum studere debeas suadeo studendi tempus abstulerim. quin ergo pugillares resumis et aliquid ex his uel istud ipsum quod coeperas scribis?"

notae: egere, istud

auri regula et prosperitas oeconomica

ut in hoc tractatu dicitur, "ergo quo facto qua aetate in his foederatis ciuitatibus ordo medius oeconomicus floruit ei aetati finis impositus est?  factus est thalerus facticius."

in hoc tractatu refertur quod ea pretiorum inflatio quae maxima sub auri regula euenit quam ea inflatio quae ex hoc harum foederatarum ciuitatum argentarii consilio eueniet minor est.

e Xenophontis Memorabilibus quattuor partes memorabilissimae

prima haec historia: cum Aristarchus quasdam cognatas quae apud se habitarent neque ullum opus facerent sibi oneri esse questus esset Socrates dixit "sed si eis imperaueris ut operatiuae sint tu quidem quippe qui eas tibi prodesse uideas eas amabis eae autem quippe quae te propter se gaudere cognouerint te diligent" (2.7).

secunda theoria quod mundus a deis constitutus est qui hominibus utilis esset, et quod etiam ceterorum animalium causa finalis est hominibus prodesse (4.3).

tertia theoria quod sunt leges quas non homines fecerunt sed dei hominibus imposuerunt (4.4).

quarta theoria quod libertas et temperantia inseparabiles sunt (4.5).

qui cibi temporibus difficilibus seruandi sint

hic tractatur qui cibi temporibus difficilibus seruandi sint: inter alia butyrum arachideum et crustula et nuces et cerealia et siccati fructus et ei cibi qui in pyxidibus metallicis seruantur. 

cur in Francia pauciores paruuli id quod Anglice ADHD dicitur habere putentur

in hoc tractatu disseritur de eo quod in Francia quam in his foederatis ciuitatibus multo pauciores paruuli intendendi animi impotentiam nimiamque actiuitatem (idest id quod Anglice ADHD dicitur) habere putantur et ideo medicamentis uti iubentur et proponitur quod illa res obseruata ex efficiendi ut paruuli sui compotentes fiant modo Francico dependet.

qui papae extra Europam nati sunt

hic disseritur de iis papis qui extra Europam nati sunt:
Victor I in Africa natus;
Miltiades in Africa natus;
Gelasius I in Africa natus;
Ioannes V genere Graeco sed Antiochiae natus;
Ioannes VI genere Graeco sed Ephesi natus;
Anicetus in Syria natus;
Sisinnius in Syria natus;
Constantinus in Syria natus;
Gregorius III in Syria natus;
Petrus Bethsaidae natus;
Theodorus I genere Graeco sed Hierosolymae natus.

quomodo scientia physica se habeat

tractatus in quo disseritur quomodo scientia physica se habeat, idest, quaeritur cur grauitatio ceteris potestatibus fundamentalibus minores uires habeat.

sancti Thomae Aquinatis uia prima et Isaaci Neutonii lex prima

in hoc tractatu quaeritur sintne sancti Thomae Aquinatis uia prima et Isaaci Neutonii lex prima sibi inuicem contrariae.  ibi est nexus quoque qui ad alium tractatum fert.

inflatio pecuniaria et laxatio quantitatiua

huic tractatui insunt hae theses: prima quod ex laxatione quantitatiua ii qui in ordine medio oeconomico sunt nulla re praeterquam minus ualidis thaleris afficientur; secunda quod inflatio pecuniaria quippe quae rerum oeconomicarum correctionem impedit saluti communi detrimentosa est.    

in hoc tractatu notatur quod fieri potest argumentatio quod laxatio quantitatiua progressum oeconomicum tardat. insunt multae quoque theses ex quibus hae memoratu dignissimae uidentur: prima quod ipsa pecuniae creatio ut res oeconomicae floreant efficere non potest; secunda quod munerum carentia et tardus progressus oeconomicus oriuntur non ex eo quod pretiis sic datis nimis pauci pecuniam impendere uelint sed ex eo quod non efficiatur ut pecunia stabilis sit et ex eo quod dominium proprium non adplene fulciatur et ex eo quod prout homines emere et uendere uelint non ita pretia mutari sinantur et ex eo quod qualia uectigalia et regulae operandi et reseruandae collocandaeque pecuniae emolumenta delent talia uectigalia et regulae non euitentur.

quidam Mahumetistae qui in harum ciuitatum foederatarum naues impetus faciebant

in hoc tractatu tractantur ii impetus quos saeculo duodeuicesimo quidam Mahumetistae qui Africam septentrionalem incolebant in harum ciuitatum foederatarum naues faciebant. de ea re Ioannes Adamides et Thomas Galfridides in Anglia cum legato Tripolitano collocuti sunt.  Ioannis et Thomae epistola quod opus Anglice "The Diplomatic Correspondence of the United States of America" dicitur in eius operis uolumine primo paginis 604 et 605 inest. ibi referuntur haec:

"cum legato Tripolitano in eius domo collocuti sumus....tam libere nos gessimus ut aliquantum quaesiuerimus quo praetendendo illi qui populi illis nihil nocuissent iis populis bellum inferrent....nobis legatus respondit id [bellum] prophetae sui legibus niti; id in Alcorano suo scriptum esse; qui populi se [idest eos qui Mahumetistae non sunt] auctoritati suae [idest Mahumetistarum] subesse non fassi essent omnes eos populos peccatores esse; ubicumque tales populi inueniri possent iis belli inferendi et omnium eorum quos ipsi in uincula capere potuissent in seruitutem addicendorum ius et officium sibi esse; certum esse hoc quod qui Mahumetistae in proelio interfecti essent omnes ii in paradisum inirent."

Carolus Daruinus et causae finales

in hoc tractatu noto hanc de causis finalibus argumentationem: "Daruinus non agnoscens quid faceret causam finalem idest uitae conseruationem et speciei propagationem saltem omnibus animatis posuit. ea autem causa finali posita selectio naturalis et quae specierum euolutio inde euenit ea euolutio quas ille posuit non aliae sunt quam medium quo omnia animata ad consequendum finem quae iis re uera est causa finalis utuntur."

sanctus Gregorius papa I et concilium Constantinopolitanum secundum

de concilio Constantinopolitano secundo sanctus Gregorius papa I in epistola quae sub numero 4.39 in huius libri columnis 713-715 continetur dicit "quod autem scripsistis, quia epistolam meam reginae Theodelindae transmittere minime uoluistis pro eo quod in ea quinta synodus nominabatur si eam exinde scandalizari posse credidistis recte factum est ut minime transmitteretis. unde nunc ita facimus sicut uobis placuit ut quatuor synodos solummodo laudaremus. de illa tamen synodo quae in Constantinopoli postmodum facta est quae a multis quinta nominatur scire uos uolo quia nihil contra quatuor sanctissimas synodos constituerit uel senserit quippe quia in ea de personis tantummodo non autem de fide aliquid gestum est et de his personis de quibus in Chalcedonensi concilio nihil continetur sed post expressos canones facta contentio et extrema actio de personis uentilata est. nos tamen sicut uoluistis ita fecimus ut eiusdem synodi nullam memoriam faceremus". ut hic notatur, ut sanctus Gregorius concilium Constantinopolitanum secundum tractauit sic concilium Vaticanum secundum tractare licet. nam ut in concilio Constantinopolitano secundo "non...de fide aliquid gestum est" sic concilium Vaticanum secundum ut Paulus papa VI dixit "nullum doctrinae caput sententiis dogmaticis extraordinariis definire uoluerit".

quidam libri manuscripti qui per interrete uideri possunt

mihi per Gregem Latine Loquentium innotuit quod hic est index eorum librorum manuscriptorum qui in Bibliotheca Vaticana sunt et per interrete uideri possunt.

acceptare

de eo quod est acceptare Aegidius Forcellinus dicit "frequentat. ab accipio sed eiusdem fere significationis....ap. eccl. scriptores significat tamquam gratum recipere".  quod assensus acceptando inesse solet ex eo opere quod nomine Postillam super Ionam Guillelmus de Luxi saeculo decimo tertio scripsit patet.  nam ibi is dicit, "quod enim acceptamus ad nos accedere concedimus et quod non acceptamus repellimus".

I. R. R. Tolcinus recitans

in hoc blogo audiri potest I. R. R. Tolcinus de anulis uersus recitans.

interrete

ut hic refertur, interrete modernum anno 1983 in usu esse coepit.

quomodo horum temporum infelicitatem oeconomicam politia foederalis causauerit

huius thesis quod horum temporum infelicitatem oeconomicam politia foederalis causauerit argumentatio hic et hic et hic et hic legi potest.  tractatui tertio inest argumentatio quod hanc infelicitatem oeconomicam politia foederalis causauit poscendo ut quales homines ad mutuandam pecuniam minime idonei erant talibus pecunia mutua daretur, idest quibusdam hypothecarum speciebus. nunc autem, ut in hoc tractatu refertur, illas hypothecarum species nouae regulae uetant. scilicet illarum hypothecarum uetitio importat illas malas fuisse.

sancti Augustini et sancti Thomae Aquinatis de Bibliis Sacris opiniones

ad dissertandam mundi aetatem et specierum origines fortasse utiles sunt hae sancti Augustini et sancti Thomae Aquinatis sententiae: 

"causaliter ergo tunc dictum est produxisse terram herbam et lignum, id est producendi accepisse uirtutem. in ea quippe iam tamquam in radicibus, ut ita dixerim, temporum facta erant quae per tempora futura erant" (de Genesi ad litteram 5.4.11)  

"sicut Augustinus docet, in huiusmodi quaestionibus duo sunt obseruanda: primo quidem ut ueritas Scripturae inconcusse teneatur; secundo cum Scriptura diuina multipliciter exponi possit quod nulli expositioni aliquis ita praecise inhaereat quod si certa ratione constiterit hoc esse falsum quod aliquis sensum Scripturae esse asserere praesumat ne Scriptura ex hoc ab infidelibus derideatur et ne eis uia credendi praecludatur" (summa theologiae Ia.68.1)

"nihil postmodum a Deo factum est totaliter nouum quin aliqualiter in operibus sex dierum praecesserit. quaedam enim praeextiterunt materialiter sicut quod Deus de costa Adae formauit mulierem. quaedam uero praeextiterunt in operibus sex dierum non solum materialiter sed etiam causaliter sicut indiuidua quae nunc generantur praecesserunt in primis indiuiduis suarum specierum. species etiam nouae si quae apparent praeextiterunt in quibusdam actiuis uirtutibus sicut et animalia ex putrefactione generata producuntur ex uirtutibus stellarum et elementorum quas a principio acceperunt etiam si nouae species talium animalium producantur. animalia etiam quaedam secundum nouam speciem aliquando oriuntur ex commixtione animalium diuersorum secundum speciem sicut cum ex asino et equa generatur mulus et haec etiam praecesserunt causaliter in operibus sex dierum" (summa theologiae Ia.73.1)

de minore telluris calefactione tractatus

in hoc tractatu dicitur quod tellus ex carbone priore opinione minus calida fiet.

cerebrum et discere

in hoc tractatu hae tres theses prima quod homo tantummodo cerebri parte decima utatur secunda quod paruulo in praeschola uersanti cerebrum cum multis stimulis subiiciatur melius fiat tertia quod homo quem discendi modum anteferat eo modo utens plus discat dicuntur falsae esse.

duplicis effectus argumentatio

duplicis effectus argumentatione Sanctus Thomas Aquinas in Summa Theologiae in IIa.IIae.64.7 sic utitur: "nihil prohibet unius actus esse duos effectus quorum alter solum sit in intentione alius uero sit praeter intentionem. morales autem actus recipiunt speciem secundum id quod intenditur non autem ab eo quod est praeter intentionem cum sit per accidens, ut ex supradictis patet. ex actu igitur alicuius seipsum defendentis duplex effectus sequi potest unus quidem conseruatio propriae uitae alius autem occisio inuadentis. actus igitur huiusmodi ex hoc quod intenditur conseruatio propriae uitae non habet rationem illiciti cum hoc sit cuilibet naturale quod se conseruet in esse quantum potest. potest tamen aliquis actus ex bona intentione proueniens illicitus reddi si non sit proportionatus fini. et ideo si aliquis ad defendendum propriam uitam utatur maiori uiolentia quam oporteat erit illicitum".

duplicis effectus argumentatio hic quoque et hic explicatur.  ad hoc quod alterius effectus rationem habere legitimum sit necessaria sunt quattuor haec: primum quod ipse actus malus non sit secundum quod effectus malus in intentione non sit tertium quod effectus bonus non ex effectu malo oriatur quartum quod effectus bonus effectui malo proportionatus sit.

etiam in libro qui "Tela nuclearia: responsio Catholica" dicitur tractat G. E. M. Anscomba duplicis effectus argumentationem, ut hic legi potest.

de putata telluris calefactione quaestiones

si tellus nunc calidior fit quaerenda sunt haec:

quaestio prima: ex hominumne actibus tellus nunc calidior fit?

quaestio secunda: si tellus nunc ex hominum actibus calidior fit quae remedia oportet adhiberi?

quomodo ad quaestionem primam respondendum sit incertum est.  nam si, quae res ab hominibus causari non poterat, sicut hic explicatur, mille fere annis antehac tellus calidior fuit pateat quod tellus ex aliis quam qui hominum actus sunt rebus calidior fieri possit et ideo ex hac telluris calefactione haec conclusio quod tellus nunc ex hominum actibus calidior fiat non ex necessitate sequatur.

quod ad quaestiones primam et secundam attinet, huic tractatui inest argumentatio quod utrum tellus ex hominum actibus calidior fiat necne haud certum est et quod etiamsi ita fiat oportet nondum ullum contra id facere.

quod ad quaestionem secundam attinet, fortasse, ut in hoc articulo dicitur, quam telluris calefactionem inhibere melius est calidioris telluris problemata singula soluere. exempli gratia si tellus calidior fiat plures homines malaria affici poterunt. ad inhibendam autem telluris calefactionem necessariae erunt magnae opes. nam necesse erit ut pro energia carbonacea adhibeantur alii energiae modi qui nunc maiore impendio stant. malaria autem remediis propriis quam telluris calefactione generaliter inhibita multo minore impendio comprimi poterit. impendii autem rationem habere oportet quia si opes potius quam in energia carbonacea in energia solari uel alia tali consumantur homines pauciores opes ad alia habeant.

quae lex de medicina anno 2010 iussa est

si, ut hic explicatur, ea lex quae de medicina anno 2010 iussa est tanta uitia habet cur iussa est?

quae pecunia in dicta energia uiridi perdita est

late scitur, ut hic et hic et hic refertur, quod perditi sunt 500,000,000 thaleri quos mutuos quaedam laminarum solarium factiua societas nomine Solyndra ab politia foederali idest ab harum ciuitatum foederatarum populo acceperat.

etiam defecit alia societas quae, ut in hoc tractatu exponitur, raedarum electronicarum pilas electrochemicas faciebat in qua multa pecunia a politia foederali collocata erat.

in hoc tractatu refertur quod ex iis 113,000 hominibus qui se inscripserant ut ad dicta munera uiridia instituerentur 11,613 homines idest tantummodo pars decima munus acceptum sex menses plusue tenuerunt.  in illa institutione autem a politia foederali consumpti sunt 329,000,000 thaleri.  ergo quodque munus 28,000 thalerorum impendio stetit.

quomodo pater et mater inter se differant

in hoc tractatu defenditur haec thesis quod in educandis paruulis pater et mater inter se differunt.  ex quodam libro qui Anglice "Do Men Mother?" (idest Latine "Educantne uiri paruulos modo materno?") dicitur notantur haec: primum quod pater saepius paruulum sibi lusu coniungit secundum quod pater magis studet ut exercitationes corporales cum paruulo foris agantur tertium quod paruulo animum uulneratum patiente pater soluendo problemati maiorem operam dat quartum quod pater paruuli animum ad subeunda pericula confirmare magis solet.

causae finales

in hoc opusculo Eduardus Feser tractat utrum causae finales naturales importent esse Deum necne.

hic idem tractat quattuor causalitatis finalis modos.

hic quoque idem causalitatem finalem tractat.

tres theses quae ad institutionem tertiariam attinent

in hoc tractatu describuntur tres de institutione tertiaria theses: prima quod multi sint ii qui si institutione tertiaria omissa aliquam artem mechanicam discant uel negotiatores fiant quam si in institutione tertiaria pecuniam insumant melius se habeant secunda quod futurum sit ut institutionis tertiariae pretium per nouas res technicas minuatur tertia quod ad institutionem tertiariam pecuniae parcere non nisi aliorum bonorum impendio fieri possit et institutio tertiaria quam ignorantia minore impendio stet.

artium antiquarum renascentia Italica

in hoc libro qui Anglice "Humanity and Divinity in Renaissance and Reformation" dicitur Ronaldus Vittus considerat quomodo artium antiquarum renascentiam Italicam Lupatus Lupatius (1241-1309) et Albertinus Mussatus (1261-1329) et Franciscus Petrarca (1304-74) promouerint.  Vittus dicit quod medio saeculo decimo tertio inter eos qui in Italiae partibus septentrionali et media poemata ex antiquis regulis scribebant illam rem prosperrime gessit Lupatus, quod autem uerisimile est quod primus recentiores pulchritudinis poeticae regulas antiquis regulis constanter posthabuit Lupati discipulus Mussatus, quod autem primus Ciceronianam morum et eloquentiae iunctionem explicauit Petrarca.

gens Habsburgensis et Austria

 

saeculo undecimo Radbotus comes cum prope Brugam se collocauisset castellum nomine Habsburgum aedificauit.  anno 1273 Rodolphus Habsburgensis in Romanorum regnum electus est.  anno 1282 mensis Decembris die uicesimo septimo Rodolphus Austriae ducatum quem Ottocaro Bohemiae regi ademerat Alberto et Rodolpho filiis dedit.  anno 1283 autem hic Rodolphus Austriam Alberto fratri cessit.  ergo Albertus solus Austriam regebat.  anno 1438 Albertus Austriae dux V in Hungariae et Bohemiae regna electus est.  anno 1439 autem mortem obiit.  ergo Austriae ducatum et Bohemiae et Hungariae regna Ladislaus Alberti filius anno 1440 natus accepit.  anno 1453 Austriae ducatus in archiducatum eleuatus est.  postquam Ladislaus anno 1457 mortem obiit gens Habsburgensis Bohemiam et Hungariam amisit.  anno 1477 Maximilianus Frederici archiducis filius quippe qui Mariam Burgundiensem in matrimonium duxerat quae regiones Germanicae humiles dicuntur eas regiones accepit.  anno 1493 Frederico mortuo Maximilianus Austriae archiducatum accepit.  anno 1519 Maximiliano mortuo Carolus Maximiliani nepos qui anno 1516 Hispaniae regnum acceperat et Ferdinandus Caroli frater Austriam acceperunt.  anno 1521 autem Carolus Austriam Ferdinando cessit.  cum Ludouicus Bohemiae et Hungariae rex anno 1526 interfectus esset Ferdinandus quippe qui Ludouici sororis maritus erat Bohemiae et Hungariae regna accepit.  anno 1713 quae Germaniae inferioris prouinciae regno Hispanico subiacebant eae prouinciae Austriae cessae sunt.  anno 1794 autem illae prouinciae ab Francis captae sunt.  anno 1804 Franciscus Austriae archidux Austriae archiducatum in imperium mutauit.  anno 1918 Austriae imperium dissolutum est.

in hoc libro in paginis 1-7 est Austriae dominorum index.